美股偏軟，亞洲股市呈個別發展，港股經過前日急升200點，噚日唞唞氣亦好自然，不過好友仍然力守12000大關收市，恒指早段曾跌逾百點，但在中銀香港（2388）及聯通（762）支持下，跌幅收窄至28點收市，恒指收報12027。市場焦點轉移至國企股，追炒業績靚股份。
上海石化（338）預料首三季純利升幅逾50%，股價勁升9.4%至2.10元；安徽海螺（914）又話全年純利增幅會超過50%，刺激股價勁升13.33%。中銀香港翻炒人民幣結算行大熱身份，大升6.3%，收13.50元，股價創歷史新高，成交高達10.7億元。
多間歐資大行繼續唱好駿威（203），股價再升5.1%，收報6.15元，連帶牡丹汽車（8188）亦話炒落後，勁升15%，收1.08元。華晨（1114）將於本周六首度推出國產寶馬車系，相信後市會有一番炒作。不過大家要小心，國家發展和改革委員會已發出警告，國內汽車生產力於4年後會出現過剩現象。單係呢一點，外資已經有足夠理由隨時造淡。
市場認為孫公的第十招等於冇招，導致地產股回軟。Cookie話，其實孫公重有第十一招，就係取消一切買樓資助。理論上，撤銷買樓資助會減低置業需求，但香港人一向唔肯執輸，如果知道就快冇資助時，個個都會爭住在撤銷前申請置業貸款，並在限期前置業，做最後一批受惠者。
港人於過去四五年經濟不景時唔敢亂使錢，其實有足夠購買力，問題係政府識唔識「撻火」，刺激資金流向樓市。
阿虎