新車速報：<br>新代理頭炮！富豪S802.5T添裝備再出擊

新車速報：
新代理頭炮！富豪S802.5T添裝備再出擊

瑞典富豪（Volvo）汽車香港代理權落實，新車接踵而來，最先打頭陣會係至頂級Facelifted新版嘅S802.5T豪華轎車，唔單止外形包裝予人一新耳目之感，車廂陳設亦較前出眾悅目，而全新2.5公升Turbo偈，匹配最新5前速波箱，反應更教人刮目相看。想認識新代理旗下呢部至Top嘅豪華車款？就真係唔好錯過今趟嘅機會喇！

記者、攝影：陳偉林　ImageGirl：Cody

■鑲有銀白電鍍框邊嘅新款鬼面罩，好切合時代節拍。

■全新尾泵把附整流設計外，重置有泊車感應裝置。



瑞典富豪（Volvo）汽車，一向重視安全設計，近年為要迎合普羅車迷嘅需要，重大肆粉飾車款外形及追加設備；而早陣子，並加入高性能嘅R系列，還新增有主動式底盤裝置嘅Four-C（ContinuouslyControlledChassisConcept），大大加強行駛中汽車嘅穩定性及操控力，相信日後新車款及追加配套會陸續在港推出。

■一對尾燈亦有新編排，明亮又奪目。

■鴨尾狀車尾設計，重有電鍍框邊及Volvo字樣配襯。



動感造型富新鮮感
響新代理新人事新作風底下，率先打入香港市場嘅Facelifted新版S802.5T，大可以脫胎換骨去形容，皆因整部車嘅外形，換裝上全新鬼面罩、更富跑車動感嘅前後泵把連氣霸外，還有全新低風阻門邊電鏡、Xenon大燈同尾燈組合，加埋四輪跑意盎然嘅17吋新款合金胎軨配搭，單係外觀上，經已教人留有深刻印象呢！

■全新座艙鋪排時尚又豪邁，還滲透出一份活力感。

■原廠電天窗前後備有獨立照明，又有出入扶手配搭。



配套齊備享受至高
講到車廂，四周不僅加有瑰麗嘅桃木修飾，兩旁車門手枕重係新設計，務求給予乘客有更愜意嘅乘坐享受。再者，前後兩排高級皮椅，剪裁貼身見承托力外，響全新表板配襯下嘅四幅式真皮軚環，手感出眾又見轉向輕盈準確，既有齊高級音響連左右獨立恒溫冷氣裝置，又有前後獨立照明，以及前後八個安全氣袋連充氣簾幕，配套設施可謂一應俱全㖭！

■低地台低腰線設計，有利尾廂提存物件用。

■以人體工學設計嘅仿桶形前排座椅，既有全方位電控之餘，兼且重設有護脊功能。

■後排座席空間寬敞，中央更備有雜物匣同杯座，另外重有活門直通尾廂。



新2.5公升Turbo偈性能躍進
新車用上一台全新2.5公升直5DOHC偈及低壓Turbo配搭，還加入一套電子5前速自動波，起跑加速凌厲有力之餘，轉檔亦見順滑敏捷，而穩妥嘅底盤及懸掛組合，加上四輪高效能碟式制動，以及電子ABS連EBD裝置，表現柔韌富支持力外，重見收放自如及有突出嘅循迹反應㗎！

■鑲有銀白框邊嘅全新表板組合，既悅目又見資料豐富。

■四幅式真皮軚環手感出眾，兩旁重附有行車電腦及音響遙控鍵。

■表板旁重有齊車燈、霧燈同表板光暗調校。

■全新5前速自動波，反應敏捷轉檔順滑。

記者評語：樣靚性能出眾
全新引入嘅Facelifted新版S802.5T，明顯造型要來得時尚具活力感，予人擺脫富豪汽車固有嘅沉實作風；新加入一台2.5公升Turbo偈，匹配全新5前速自動波，起跑加速衝勁有力，重不失一派豪邁個性㖭！

Cody評語：坐得舒適又貼服
部車台型十足造型又獨特，置身其中空間既寬敞又見氣派不凡，響寧靜舒適嘅環境下，聆聽悠揚悅耳嘅樂曲，最教人身心舒泰。

富豪S802.5T規格
引擎：2521cc直5DOHCTurbo
馬力：210ps/5000rpm
扭力：32.7kgm/1500-4500rpm
傳動：5前速自動波，前輪驅動
懸掛：（前）柱式獨立（後）多連桿
制動：（前）透氣碟（後）碟式（ABS）
輪胎：225/50ZR17PirelliP6000
尺碼：4820×1830×1450mm
軸距：2790mm；車重：1465kg
0-100公里：7.7秒；極速：225km/h
平均耗油：10.0L/100km
新車售價：約港幣40萬起
車輛提供：維信汽車（29238080）

■新車一台2.5公升Turbo偈柔韌有力，尤其低轉扭力輸出更強。