港股急升一日，就在萬二關口整固，但市場承接力好強，成交又升上180億元，新錢入市之勢未止。恒指收市12027，跌28點，期指收報12008，跌43點，低水19點，下跌股稍多。噚日係升上萬二關後的第2日，若能守穩而再起升浪，可向12600水平推進。
國企股始終都係上升股嘅主流，國企指數大升96點，升幅2.6%，成交36億元，動力咁強，預計國企升市可維持多一兩個禮拜。除石化同鋼鐵股外，最強嘅係安徽海螺（914）同中海發展（1138），前者收8.5元，大升1元，升幅13.3%，後者高收5.45元，升0.6元，升幅12.3%，都係嗰句，基金已收乾貨，升勢可隨意發揮。
上海石化（338）報上第3季佳績，股價反應強烈，成為國企升市火車頭之一，收市2.1元，大升9.3%，成交更大增至9416萬股，係22個月以來最高紀錄，照走勢睇，呢個浪可見2.5元。
今時今日，國企已成為基金市，佢哋上咗手嘅股票，一係唔郁，一郁就升到你唔信。除咗呢輪大眾津津樂道嘅熱門國企外，基金新貴噚日又加多一隻，就係電力股山東國電（1071），大行全日力掃，結果以高價2.625元收市，升0.15元，升幅6%，成交則大增到近5000萬股。
其實，山東國電在2.1元至2.5元間徘徊上落，足足有成3個月，噚日破位而上，初步目標係2.9元，若以今年4月開始上升的形態來衡量，中期上升目標指向3.6元。
今年首3個季度，山東國電的發電量係2198萬兆瓦時，只增長3.3%，係3家國企電力股中增幅最低的，但一波報告就認為，增幅低係由於省內有新建成的發電廠攤薄需求，但市場忽略了一個主要的因素，就係04年開始，山東省唔會再有新發電廠，而用量將會上升。
一波估計山東國電04年及05年盈利，可上升21%及20%，與華能（902）及北京大唐（991）05年預測PE分別為15.1倍及9.1倍相比，山東國電的7.4倍PE，無疑係極為吸引。重有一點，華潤電力安排上市，其04年度PE17倍，以及05年度PE10倍，肯定對山東國電的股價有拉動作用，一波料股價短期可見2.9元，至於A股上市已快落實，亦屬利好。
郭兆誠