奧瑪花曼（UmaThurman）主演套話題電影《標殺令》，今日終於殺到嚟香港。嚟緊星期日（十九號）下晝兩點重會喺銅鑼灣紐約戲院搞免費放映，只要係成年人，着黃衫到場就有機會攞飛。
我大口羅拉已經睇咗試片，發現除咗導演昆頓塔倫天奴（QuentinTarantino）大玩暴力血腥嘅場面夠晒出位之外，入面加插一段講劉玉玲個角色成長生活嘅卡通，一樣拍得好過癮！
塔倫天奴為咗帶出呢個由劉玉玲飾演嘅黑社會大家姐石井阿蓮，童年時嘅遭遇係幾咁慘烈，所以佢揀咗用卡通片嚟交代，除咗將報仇呢件事唔使整到咁嚴肅死板外，重有個優點就係卡通片可以玩得更暴力。
喺段片入面，唔止睇到阿蓮個紅衣女殺手look，而且重見到佢細個匿喺床下底，親眼睇住父母俾人殺死嘅場面。阿蓮等到中學嗰陣就向殺親仇人報復，個黑幫大佬仇人有孌童癖，佢就趁喺獻身嗰陣殺到佢肚破腸流。
我羅拉睇過唔少日本卡通，發現阿蓮個揸刀日本學生妹look，真係好似日本卡通《BloodTheLastVampire》嘅女主角小夜，後來發現原來兩個卡通都係由日本I.G.動畫公司製作。聽聞塔倫天奴係睇咗《BloodTheLastVampire》後，就邀請咗I.G.公司合作，所以喺卡通度劉玉玲嘅look咁似小夜係有原因嘅。