張栢芝和陳小春近日被傳愛火重燃，二人上周出席完梅艷芳生日派對後，再會合耍樂，卻被尾隨的周刊記者撞破，小春更涉嫌毆打對方。栢芝昨日在廣州宣傳時力撐小春，除表示無論甚麼情況都支持他外，還大讚小春「好純」。
張栢芝昨日在廣州出席潤唇膏宣傳活動，有雜誌報道陳小春上周在梅艷芳四十歲生日會後，跟栢芝前後腳離開後，再會合消遣，但被追訪的記者撞破好事，小春更涉嫌怒打《壹週刊》記者洩憤，事件現正交由警方處理。
栢芝昨日接受訪問時力撐小春，她除了大讚小春外，還表示無論發生甚麼情況，都會支持他。其實小春過往曾試過不滿記者追訪，最近一次是在去年，強搶記者的數碼攝錄機，事件最後由警方調停。
對於小春與記者間的衝突，栢芝表示當日不在現場，加上未看過報道，不便發表意見，但她句句力撐小春，栢芝說：「小春係我好朋友，無論發生乜嘢事，我都支持佢，我認識佢咁耐，佢為人好純，非常之好。小春個樣好似好型，有記者問我佢係咪好暴躁，我認為咁樣講對佢唔公平。」
栢芝又大談美容心得，她說：「我近期keep住做運動同飲暖水，夜晚都會早啲瞓。」
內地記者質疑一向愛夜遊的栢芝是否可以做到早睡，她說：「我得呀，我𠵱家冇失眠，二十四小時都瞓得着，我近日重開心咗，壓力又少咗。我冇亂諗嘢就瞓得着。」
栢芝以往提到緋聞男友都顯得避忌，可是這次卻力撐小春，栢芝說：「我知道無論發生乜嘢事都要睇開，就算唔答，傳媒都會追訪，倒不如大大方方回答，我𠵱家都睇得好化。」
記者卓美娟廣州直擊
