神舟五號，昨晨九點已經發射，阿董要遲到下午四點，先至識得反應，「代表」香港人，向中國政府致發賀電。
上次去曼谷謁見溫總，阿董遲到五分鐘，搞到溫總要喺酒店乾等，並頻頻問要唔要搵架車去接。阿董賀電今次豈止遲到咗五分鐘，成七粒鐘咁多，連㗎仔日本政府都快過佢，中午已經賀電擦鞋，愛國愛得連日本都落後埋。
八方同一班豬朋狗友飲茶，口痕友話，阿董若果以個人名義，賀電遲到，都係佢自己一個人孭上愛國落後於人嘅死罪，最弊係話佢「代表」咗香港市民遲到，咁就累死香港人，國家開放自由行就嗱嗱聲，香港人賀神舟飛天就反應慢，第日北上，實俾十三億人喝打。
不過，豬狗堆之中，又有一名忠心挺董人士，幫阿董遲發賀電解畫，佢話：「董生遲咗幾個鐘發賀電，係經過深思熟慮嘅，因為隻火箭一發射上去，重要摸索一輪先至入太空軌道，飛機最易失事，就係開足馬力起飛嗰吓，萬一神舟五號一發射，遭到法輪功分子喺地下發功破壞，又或者美國佬發射導彈轟擊（八方按：呢樣絕對唔出奇，美國佬連我國駐南斯拉夫大使館都敢炸，又將王偉架飛機打埋落海，布殊狼起上嚟，為爭取連任，博取美國廣大選民掌聲，又有乜嘢做唔出），萬一升空之後有啲啲冬瓜豆腐，咁阿董個賀電發出咗，咪變咗攞景？所以凡事睇定啲，隻火箭冇爆喎，打電話問准中央，可唔可以發賀電呀，中央話得嘞，佢先至去馬，咁嘅性格，係好穩重啫。
另一個挺董人士亦駁八方：你哋班香港人成日話阿董口臭，佢嗌人買樓，樓價就跌，話經濟會復甦，個市就撻多兩嘢，阿董若果太早祝賀我國火箭征空成功，以佢條命，同國家香港利益咁相剋，咁隻火箭豈不是會凶多吉少？所以全世界都可以祝賀祖國成功，唯獨阿董唔可以立亂開口，佢睇定啲，諗清楚，話唔定，喺發出賀電嗰一個時刻，換定一條紅底褲着喺裏邊，咁隻火箭跟住至冇事，人哋阿董真係經一事，長一智呀。
今次射火箭，阿董又俾人批評，不過，阿董今次都有知音人，因為點都慘唔過個太空人。上到去太空，重以為可以耳根清靜吓，點知重俾國防部長曹剛川揸實個咪唔放，對住個螢幕大講三個代表論，雞啄唔斷，好似老婆哦個老公，或者老母教仔咁，阿董同唐唐，唔係唯一嘅受害人，神舟一上天，喺個宇宙咁遠，都有人同自己同病相憐呀。
傳真︰2623-9278
電郵︰