RollingStones班長者唔嫁又嫁，政府包底八千萬重要俾人玩到「陀陀擰」，班長者喺香港嘅叫座力係點，八方真係唔樂觀，起碼連自認老餅嘅李柱銘都話冇興趣，精打細算嘅會計界李家祥笑笑口話：「後生時睇都唔使咁貴！」
不過，凡事有例外，劉慧卿喺立法會同記者傾偈，話一早叫助理去買飛，但卿姐引述佢助理話訂票「好鬼複雜，又揀唔到位，好『×』（粗口）麻煩，不如自己去買。」
記者見卿姐連助理講嘅「助語詞」都如實引述，個個笑到碌地，當事人卿姐就好似冇乜嘢咁，唔通講咗粗口都唔知？
至於一講RollingStones就變樣嘅官，除咗米老鼠外，應該係民政事務局局長何志平，記者問佢呢次點收科，佢好似唱大戲咁：「你……（足足你咗七八次）問投資推廣署！」
（圖）卿姐複述佢助理話訂票好麻煩，但就加埋助語詞。
傳真︰2623-9278
電郵︰