香港不少女孩子都愛下廚，想不到連小朋友對入廚也甚有興趣。就如3歲的映霖和6歲的楨怡，成日嗲媽咪要玩真的煮飯仔。鐵柱磨成針，終於成功，經常夾埋印尼工人Winarti煮菜。今次示範的印式粟米餅，兩姊妹負責預備材料，工人則專責落鑊，三人分工合作，竟然做得似模似樣。
記者：羅惠芬
攝影：黃子偉
映霖和楨怡，年紀小小已經懂四國語言，除粵、國、英三語外，重識講印尼話。皆因爸爸是印尼華僑，家裏又開印傭介紹所，理所當然用埋印傭，耳濡目染下自然識講。
一個月前，家裏請了Winarti這個印傭，三人感情好到不得了，兩姊妹對她的廚藝更讚不絕口，尤其酥炸排骨，每次都食到舔舔脷。Winarti話：「其實二人都為食，香口食物更是至愛。」印尼食物一向重辣味，為遷就小朋友，就將辣味減輕；不過香料多的特色依舊，加埋煎炸方法，難怪映霖和楨怡咁鍾意。
Winarti最撚手的是SotoAyam雞湯粉絲，不過至今為止，仍未弄過給東家品嘗。「材料除了有雞和薯仔，調味料最重要。有紅葱頭、葱、咖喱等，我家鄉好多人都識整㗎！」話口未完，楨怡和映霖已嚷着要試，果然為食！
Winarti說，兩姊妹都愛吃香口東西，不過煎炸食物對小朋友健康不好。折衷方法，惟有用健康食品做材料。兩姊妹首次嘗到粟米餅時，已經吃不停口，成日要Winarti整。這個小食最特別是調味料，胡椒粉份量特別多，紅葱頭和蒜香味十足，遠遠聞到已經香噴噴。
用咩料：
粟米 4條
紅蘿蔔 1/2條
麵粉 6湯匙
雞蛋 1隻
胡椒粉 2湯匙
紅葱頭 2粒
蒜頭 1/2粒
葱 2條
楨怡和映霖兩姊妹細細個已經好孝順，想親手弄點食物送給媽咪。為安全計，Winarti建議她們整多士，不用開爐就不怕燒傷。深知母親愛吃芝士，加埋個精心剪裁的心形圖案，媽咪見到都唔知幾感動。可惜Auntie怕羞，未能跟大家分享。
用咩料：
白麵包 2塊
芝士 2塊
煉奶 適量
