APEC每年嘅領導人會議，焦點之一係二十一位領導人着上主辦國傳統服裝，排排企合照。
往年為咗公平，合照排位跟經濟體嘅英文字母排序，所以澳洲永遠係第一個，越南永遠第尾。八方八到今年有新安排，同樣以公平原則，但係「回歸自然」，以領導人身高排位。
呢個考慮係基於構圖美感，因為領導人高矮分別好大，例如高大嘅新加坡總理吳作棟企喺俄羅斯總統普京身邊，影出嚟唔方便好睇，今年一於搞搞新意思，高人企中間，矮人企兩邊。
阿董夠晒高大，怕者可以繼續佔據中間位置，但係就會失去企喺國家主席胡錦濤身邊嘅機會。胡錦濤同台灣嘅李遠哲身高有差距，照睇都唔會企埋一齊。胡主席雖然唔算高，但有其他身形更嬌小嘅領導人墊底，應該唔使企兩邊。
大會今次重會安排領導人每次開會坐唔同位置，造就多啲機會畀不同領導人傾偈，不過據講泰國方面好識做，唔會安排胡錦濤同李遠哲坐埋一齊。
傳真︰2623-9278
電郵︰