對於英足總嚟講，阿仙奴可能好麻煩、好冇紀律，但喺超聯嘅公平競技榜，阿仙奴卻係冧巴溫，問你服未！
有關方面從攞紅黃牌嘅數目、踢得茅唔茅、對對手同球證有冇禮同埋會方官員嘅行為共五方面，計算出邊支超聯球會最有體育精神。結果，今屆被英足總charge（控告）咗十三條罪嘅阿仙奴，以八點六一分攞得第一，而車路士同曼聯就得第二同第三，得分分別係八點五四同八點四十六。
其實，有睇開阿仙奴比賽嘅球迷，都知道佢哋喺場上唔會打茅波，所以得第一唔算太過意外；但係，佢哋球員喺場外嘅行為就不敢恭維，郁啲就起火同對手埋牙，若然連呢方面都改善到，咁先算係真正嘅冧巴溫！
由於今季意甲聯比賽接連出現問題球，意大利足總將會由下半季開始廣泛使用球賽錄影帶，進行賽後判決，任何逃過法眼或者插水行為都會受到懲罰。呢個措施將大部份爭議判決擺上台，實行初期肯定惹來好大迴響，但係如果能夠杜絕不君子行為，未嘗唔係一件好事。
意大利國家隊教練查柏東尼舊事重提，話未放棄邀馬甸尼出山重新為國家隊效命，重講到有五成機會說服佢㖭。我諗大部份意大利球迷同我求大俠一樣，都覺得以馬甸尼狀態，踢國際賽根本無難度，自然想佢出山；當然，佢重願唔願承受呢份壓力，就問佢自己嘞。
馬會喺前晚足智彩英甲聯賽事「提早」派彩！如果你捉到葉士域治「主其他」呢個三十六倍波膽，只係四十分鐘就贏到五比○，幾乎肯定有錢收啦！話時話，般尼下半場破蛋，好在葉士域治完場前亦識得再入多球，連梳打埠博咗葉士域治「淨勝五球或以上」嘅波友都笑逐顏開！
愛華頓嘅蘇格蘭國腳麥法頓，喺歐洲國家盃外圍賽對立陶宛後走向場邊，準備將件球衣掟畀一位追隨佢多年、患有大腦神經麻痹嘅球迷，而跟場邊保安警員起衝突，重可能因此被蘇格蘭足總處分㖭！我求大俠就希望麥法頓唔會因此影響國際賽前途啦，話晒佢咁做都係有情義啫！