昨日講《等待滾石》，已經知道未必等得到，但一交咗稿冇耐，政府就宣佈「滾石」唔嚟，之後「滾石」宣佈一定會嚟，呢勻就真係大家都getnosatisfaction，推廣署署長盧維思成為眾矢之的，孭晒鑊。
HarbourFest（維港巨星匯）係美國商會出面搞嘅，勇氣可嘉。但美國商會並唔係一個龐大組織，平時搞大型活動嘅能力，比唔上香港總商會。譬如人人都知道翁以登博士係香港總商會嘅總裁（即昔日所稱嘅執行總幹事），但請問有邊個知道誰是美國商會總幹事（或總裁）？
美國商會理事由美國公司之中選出，過往美國公司嘅駐港人員，頂多做三至四年就調去其他國家，在香港只係過客，所以冇人理會香港社會民生事件。現任理事會主席詹康信就唔同，佢自己與朋友在七十年代中期來港，白手興家，創辦搬運公司CrownPacific專門幫外籍公司僱員搬屋（譬如由紐約搬到香港），因得風氣之先，生意好好，發晒達，由於佢後來買咗朋友嘅股權，成為CrownPacific大老闆，長期居留於香港，故此並非一般美國expat，前幾日得到頒發金紫荊勳章，就知道佢在特區政府的眼中嘅份量，等同同日得到金紫荊嘅馮國經、羅嘉瑞、黃宜弘、何鴻燊、馮紹波、曾蔭權等等。之不過，若因此而以為美國商會有足夠人力物力去辦一個巨型音樂表演節目，就係美麗誤會，盧維思為佢孭鑊，他日可能得番一個金紫荊補數！