施念慈（Celia）同陳鴻業（Alan）結咗婚之後，好多人以為佢嫁入豪門，閒來寫吓書做才女，根本唔使再捱世界，但其實佢覺得事業對女人都好緊要，就算結咗婚都唔可以同時代脫節。
最近喺機緣巧合下，施念慈識咗有線節目部執行董事徐小明，遲啲會拍電視劇《靈異偵緝檔案》，聽講係第二女主角，戲份重唔少㖭，馮仁昭都戥佢開心。
施念慈識到徐小明都可謂天意，因為佢老爺嘅辦公室就喺有線大廈，施念慈經常會返去幫老公手，幾次喺樓下撞到徐小明，大家做咗朋友，咁啱《靈》劇搵緊女主角，一次佢哋傾開偈，徐小明問佢有冇興趣拍劇，於是就一拍即合。
施念慈嘅戲份十一月開拍，大前日佢返有線攞劇本，問佢係咪已經同有線簽咗約，佢笑笑口話：「我嚟緊會同有線合作，但係詳情佢哋遲啲會公布，暫時我唔方便講住。」
陳穎妍、洪欣同康華三個靚女噚日去咗一間金舖做剪綵嘉賓，洪欣話唔係咁鍾意鑽石，佢話：「因為我好大頭蝦，好易唔見嘢，所以我每次買鑽石都係送畀阿媽多。」陳穎妍就同洪欣相反，非常鍾意鑽石，重話愈閃愈好。問到佢入行以嚟有冇富商試過送鑽石畀佢，佢就話：「都有㗎，但係我冇接受，收咗會俾人講閒話，我亦唔會接受咁貴嘅友誼。」
許志安早前買咗一部豪華七人保母車，點知俾賊仔「垂青」，有報道話佢除咗報警外，重搵咗人面甚廣嘅Ba叔幫手打聽，重有人出「暗花」，叫黑白兩道幫手。安仔噚日透過唱片公司回應，話唔見咗車係唔開心，件事亦畀咗警方處理，但佢就否認有人出暗花，亦冇搵黑白兩道嘅人幫手搵車。
馮仁昭最近八到韓國變性人女星河利秀，因為同經理公司合作得唔係好開心，所以決定唔再續約，但就唔可以再用「河利秀」呢個藝名，所以佢已經諗住改名做「利秀」。而河利秀喺台灣套劇集《嗨！親愛的》嘅拍檔施易男，因為日前力撐河利秀冇扮大牌，反寸女拍檔吳佩慈，搞到對方勁嬲，即刻大數施易男嘅不是，簡直係風波不斷。
雪梨前晚同家姐米雪喺葵芳出席一個道教活動，佢兩個都話冇宗教信仰。雪梨話年尾會返加拿大探佢對仔女。早年有指佢情緒不穩，亂發脾氣，雪梨話𠵱家已經冇事，因為佢學識放開。馮仁昭最想知嘅，反而係佢兩姊妹究竟食乜嘢，到呢個年紀都重可以keep到咁後生呢？
