第37屆日本東京車展將於下星期正式開幕，屆時多家車廠都會展出旗下最新車款及概念車，以求吸引車迷注意；而三菱車廠於日前就率先公布將於場內展出嘅新車，當中最惹人注目嘅，相信會係呢部名為i嘅概念車。
廠方響新聞稿中表明，i嘅設計概念，極有機會成為日後迷你小車嘅設計元素，而用上新設計嘅車款，更有望於2005年正式登場㖭！從造型而言，全新i概念車不但突出吸引，就連車廂布局亦極富前衞感，座椅設計亦見獨特富承托力，當然齊全車廂設備亦係賣點之一。然而，i嘅車架由鋁合金製造，輕巧之餘又見堅固，而一台1.0公升直3MIVEC3引擎，匹配CVT自動波箱，性能表現更教人留有深刻印象。