蘇格蘭喺歐洲國家盃附加賽抽着對荷蘭，行情大致睇死佢哋出唔到線。不過咁，蘇格蘭足總講明就算隊波功敗垂成，都未必使領隊福士執包袱；反而荷蘭教練艾禾卡特就話領軍出到線都會辭職。出唔到線嘅繼續撈，出到線嘅反而劈炮，真係諷刺。
自從福士領軍後，蘇格蘭雖然曾經衰到貼，但過去一年已經漸入佳境，對住荷蘭咁強嘅對手，就算天王級領隊都未必撐得住，所以蘇格蘭足總向福士派定心丸都係人之常情。至於艾禾卡特情況好唔同，隊波實力明明好強，但陣中臭馬太多；唔係內訌鬧交，就係球員唔滿意自己調動，失驚無神好似雲尼斯達羅咁踢水樽發吓脾氣就夠死啦。咁受氣，又難怪佢想劈炮囉。
今季俾AC米蘭掟咗去列斯嘅巴西後衞洛基祖利亞，日前就話希望長期留效列斯，不過咪話我求大俠話，英超快上快落節奏似乎唔多適合佢，佢加盟後列斯無乜邊場好波，有兩場重吞夠對手四隻光蛋。列斯已經無錢，試問又點會買斷呢粒「邪星」呢。
慕遜加柏自從響開鑼戰贏咗科隆，一直衰到𠵱家，最近七場波得嗰兩分咁大把，於是會方想搵返舊將、近日踢到曉飛嘅科素救亡喎。之但係科素由車路士外借去伯明翰後，持續有好表現，正一皇帝女唔憂嫁，就算車路士肯放人，睇怕都唔輪到慕遜加柏。
羅馬最近真運滯，繼迪維基奧同埋卡維受傷後，日前再添傷兵蒙迪拿，佢哋除咗踢唔到今晚對華達場波外，禮拜日對帕爾馬出唔出得都成問題。好衰唔衰托迪又發埋燒，令球隊前鋒荒危機加劇。以為今季羅馬唔使踢歐冠盃會無咁多傷病，點知季初已搞成咁，跟住點捱？
拜仁慕尼黑嘅新仔舒韋恩史汀加嶄露頭角，正當拜仁想同佢傾續長約時，估唔到呢個十九歲小朋友唔肯制，話想出去闖闖喎。外面風大雨大，佢踢過幾場好波就話想出國，斷估都係想同球會鬥拋，跳草裙舞博加人工啩。即管睇吓呢位小朋友鬥唔鬥得過拜仁班高層老薑啦。