新昌管理（2340）招股之初反應好好，掛牌首日一度高見0.83元，但好快就回落，之後連跌兩日，一度跌穿0.75元招股價，噚日反彈5.33%，收0.79元，成交金額661萬元。
經紀黃話，新昌管理同金手指淵源甚深，所以公司雖然size細細，但廣為證券界人士留意，包括炒家同埋芬佬。由於認購踴躍，包銷商乘勢攞埋隻「綠鞋」出嚟，行使超額配股權，加上公開招股部份份額加大，所以掛牌之初有壓力。
不過，有間向來同金手指好朋友，兼且近年活躍於工業股配股活動嘅歐資行，就密密掛牌幫手買入，所以新昌管理不宜睇得咁淡，分分鐘有意外驚喜都未定。
新昌管理上市雖然無耐，但今日會公布一項環境衞生管理系統生意，呢個概念好合時宜。
另外，早前一度受合作夥伴爭拗，影響股價表現嘅旺城國際（2389），噚日在另一間歐資大行追捧下，勁升28%，收1元。由於同類股創科（669）近年股價幾乎從未跌過，有芬佬退而求其次買旺城亦十分正常。
慕容小初