美股強勢畢呈，果如所料，創出近期新高，但港股要調整，噚日早段受外圍牽動，衝上萬二大關後，即告乏力，恒指一度上升逾100點，但午後由高位回落之勢甚急，結果收11856，倒跌105點收場，成交155億元，期指則高水34點。
大市升上萬二關水平，會有一番爭持，預計再調整多一兩日，若能守穩，可向高位進發。不過，升埋今次，就會進入中期調整，恒指會回落一千幾百點，個別股票則會調整10%至20%。迎接年底同明年嘅大升浪，今次將係最後入貨機會。
噚日最突出嘅大紅籌係招商局國際（144），最高曾衝破10元大關，收9.9元，升0.4元，升幅4.2%。本欄早前已提過，基金一路收集幾隻大紅籌，招商局即為其一。招商局發行21.3億股，大股東招商集團持有51.5%，其餘大部份落在基金手中，最多嘅有摩根大通持有8.9%，同鄧普頓揸5.25%，相信仍有好多揸唔夠5%而唔使宣布。
通常基金同大行「索」乾貨源後，股價就有如裝咗摩打一樣，一飛沖天，近期嘅華晨（1114）、駿威（203）、海螺（914）同江銅（358）等即為最佳例子，短短半個月內，升幅由30%至40%不等。睇呢輪個勢，招商嘅收集期應該已去到尾聲，唔使幾耐，就會有急升嘅場面出現。
招商主要從事港口及碼頭相關業務，美林證券最新嘅分析報告就推介買入，指公司管理層近期致力重組企業及加快碼頭投資，有利長遠發展，將其目標價調升到11元。其實，公司已制訂5年發展計劃，令旗下碼頭泊位由現時的25個增至55個，吞吐能力增加1.68倍，隨着貨運業務蓬勃發展，招商將進入高增長期。
今年8月初，招商由7.0元起步，升上9.9元後出現調整，形成大型三角形，近日破位而上，且有超大成交支持（4000多萬股），升勢確認，噚日高收，顯示在前高位水平的後抽整固已完成，以量度升幅計，短期上升目標指向12.1元。
重有一點，就係招商市值已逾200億元，頗大機會成為恒指成份股，中長線股價可見15元，宜逢低吸納。
郭兆誠