為四位「民主鬥士」余若薇、梁家傑、吳靄儀同湯家驊四位明星大狀，噚日俾八方發現佢哋有一個共同弱點，就係方向感同記性都麻麻。
話說佢哋噚日晨咁早八點幾，就非常神心咁趕去中環做何秀蘭嘅人肉布景板，為支持佢參選區議會對抗葉國謙造勢，上到去選舉事務處報名辦公室門口，因為地方狹窄，迫迫吓大家講笑，話題不離民主同法律，幾個大狀講笑話驚塞住門口，又俾政府頒禁制令。
雖然搞咗成個鐘大家都毫無怨言，不過散場時就出事，因為幾個大狀走先，坐電梯由吳靄儀揸𨋢，冇一個記得邊層可以去返行人天橋入口，先㩒0字，到咗出𨋢睇吓，唔似，又入返𨋢，如是者遊𨋢河遊到第三次，先搵到正確出路，湯家驊重要質疑話唔似。
（圖）何秀蘭（右三）報名區議會選舉，有四位大律師、三位立法會議員同埋多個民主團體為佢造勢，真係人強馬壯。 區民傑攝
傳真︰2623-9278
電郵︰