人到中年嘅暴躁男歌手向來脾氣唔好，加上近年佢嘅發展麻麻哋，心情就更加唔好，佢成日覺得自己鬱鬱不得志，係因為公司將資源集中放咗喺一個年輕偶像歌手身上，所以佢同公司同事亦不時有拗撬。
早排暴躁男歌手同公司幾個高層喺尖沙嘴一間好高檔嘅酒店飲嘢傾公事，講到佢嘅前途問題，男歌手就好激動，突然間揸爆自己手上嘅酒杯，搞到一手都係玻璃碎，啲同事見到佢咁嘅款，即時嚇到呆咗，但男歌手就無動於衷，繼續好激動咁噴口水，跟住又攞起另一個酒杯，再一手揸爆埋，搞到成手都係血，暴躁男歌手嘅所作所為，真係嚇親人兼失禮人。
向來同男歌手有啲交情嘅其中一個女高層，諗住上前勸佢幾句，點知俾男歌手大聲喝罵，話佢係某某某（年輕偶像歌手）嘅契家婆，重叫佢行埋一邊！其實好多人都話男歌手近年有啲失常，由呢件事睇嚟，都真係幾得人驚。
梁詠琪（GiGi）噚日到港台接受訪問，背上有唔少瘀痕，佢話：「我前幾日同媽咪揸車出街，點知俾後面架車撞到，我撞親條頸，之後咪去睇中醫，佢幫我拔罐同刮痧，𠵱家個背脊重有啲印。」問到男友鄭伊健有冇陪佢睇醫生？GiGi話：「冇呀，不過個中醫係佢介紹。」
馬浚偉喺無綫雖然唔係包薪合約，但都係無綫力捧小生之一，馬仔噚日返將軍澳電視廣播城拍攝節目巡禮，馬仔話同無綫傾緊續約問題，佢話樣樣都傾得好好，自己唯一嘅要求係想拍時裝劇，因為近期拍得太多古裝好辛苦。問佢續約嘅價錢，馬仔就笑到四萬咁口，重猛話係開心價咁話。
張家輝噚日去將軍澳電視廣播城拍攝節目巡禮片段，今次家輝扮演武松，向來搞笑係家輝嘅強項，所以呢個武松造型睇落一啲都唔神氣，反而好搞鬼。家輝透露同女友關詠荷啱啱喺日本度假返嚟，不過因為啲嘢太貴，所以最後都冇乜點買嘢。
陳小春噚日去咗紅磡差館，原來佢上周六凌晨，去完梅艷芳嘅生日會之後，同某周刊嘅記者發生衝突，最後有人報咗警，而小春噚日係去警署協助調查。小春經理人公司發言人李小姐話，因為件事交咗畀警方處理，所以唔方便講咁多。
劉嘉玲將會以浪琴表亞洲區代言人身份，喺下個禮拜二到台灣出席一連串嘅宣傳活動，除咗正式嘅記者會外，佢重會出席晚間嘅派對，今次大會特別安排咗一場上海復古風情表演，令到嘉玲鬼咁開心，佢即刻用國語講：「上海復古表演，讓正好是上海人的我非常期待來台灣。」
