個市成個石堅格，早市開出，恒指已經上破萬二，見12065，點知衰收尾，收11856，由升103點變跌105點。萬二係大關，大關之前反覆一下好應該，炒家未離場，過一陣又再玩過，年底恒指見萬二冇問題，見萬三都有機會。
4件電訊股，中電信（726）冇事，企定喺2.45元；聯通（762）跌5仙，收6.85元；中移動（941）唔見40仙，收22.85元；電盈（008）報低10仙，收5.40元，跌幅1.8%，算係最大，估計炒落後遊戲未玩完，可以搵啲Call輪短炒。
電盈Call輪最啱炒嘅係9791，日日幾十球易手，收1.12元，跌16仙，每份兌1股正股，正股只係跌10仙，隻輪跌突，啱博反彈。隻輪溢價4.1%，槓桿率4.8倍，明年3月到期，唔驚溢價縮得太快。
「鞋王」裕元（551）上周派半年成績表，多賺38%，但股價一直叫好唔叫座，昨日又跌20仙，收22.05元。不過唯一隻Call輪9878則有啲勢，收30.5仙，彈升9%，唔係乾炒，有35球轉手，金額過千萬。隻輪明年1月初到期，溢價13.1%，槓桿率7.2倍。照計冇理由正股唔升隻輪升，而本身數據又唔靚。可能嘅情況係，正股就快反彈，隻輪先行一步，要做嘢嘅話，買正股好過買隻輪。亦可能係，隻輪近期跌得傷啲，𠵱家有「技術性反彈」，唔買冇蝕底。
章盛