自由行熱潮推動內地人來港買樓，但亦有唔少港人鍾情內地市場，北上置業，貪屋苑設計靚又有度假感覺。國家建設部就出版咗一本專門介紹內地住宅嘅刊物，成本書收集咗15個20世紀90年代嘅廣東省大型樓盤，圖文並茂，講建築同設計特色之餘，重會講吓規劃等較學術嘅話題。
咪以為本書係普通料，原來所有作品都係來自誠設建築師事務所，負責建築設計嘅徐憲輝係無綫前新聞之花葉雅媛嘅丈夫。過去十幾年，由佢親手規劃過嘅國內土地超過10億平方呎，唔少樓盤攞過獎，朱鎔基參觀過嘅中山雍景園，就攞過「2000小康型城鄉住宅」規劃設計優秀獎，可見廣東省樓盤喺內地樓市發展嘅影響力都唔細。
以往國家建設部都出版過唔少介紹樓盤嘅書，但由境外單一建築師樓一手包辦就係第一次。徐憲輝話，可能建設部發現內地叫好又叫座嘅樓盤，咁啱都係誠設負責設計，所以揀誠設嘅作品刊登。本書內地有售，香港就重未有得賣。
近排成交多咗，代理行就密密開舖，美聯睇好西鐵通車後嘅市況，喺天水圍嘉湖銀座開舖。美聯新界區掌舵人布少明就話，西鐵通車後，成個新界區第4季嘅營業額可以升5成，去到1.5億。而主席黃建業就話，集團嚟緊重會喺屯門卓爾居等地開分行，年底前目標開多20間。
美聯喺天水圍已經有3間舖，不過布少明話相當睇好呢區，年底前會開多1間。原本已經入咗標競投西鐵天水圍站嘅舖位，但到𠵱家都冇結果，搞到佢好勞氣。
有成十幾年冇賣過樓嘅置地集團，好快會有新盤推出，個樓盤叫做綠意居，喺西環卑路乍街，雖然規模唔算大，只係單幢樓，但置地住宅物業高級經理黎漢群話，集團一向重質唔重量，單幢樓亦一樣交足料，叫買家放心。
樓盤重喺樓花階段，集團搵咗同一條街，42號一個近萬呎舖位做示範單位同售樓處，租金連埋裝修費，使咗成1500萬銀。香港置地出晒名係「收租佬」，手頭唔少物業組合，淨係揸住同管理嘅中環核心商業區寫字樓同商舖，就有成500萬方呎。
今次點解唔搵自己嘅物業做售樓處，要向散業主租舖位？目的不外乎係想搵個最佳位置，方便帶客睇樓同推介。
況且，置地喺中環心臟區嘅商場，雖然人流好旺，但要搵個空置舖位都好難，全部有租客，租金唔平，計落條數唔多化算。
上個月樓市可以用「熾熱」嚟形容，好多代理都有唔錯嘅回報，但係旺市下測量師行反為唔多開心。蘭西聽啲測量界老友大吐苦水，話佢哋嘅工作量大增，但係實際收入就認真唔理想。
原來好多業主見樓市郁番，心思思想知道自己個單位最新行情係值幾多錢，於是打電話畀銀行話想買樓，報出嚟就係自己住緊嘅地址；銀行唔知內情，為咗增加做生意機會，點都幫個客估吓價。咁樣自然係問嘅多，成交少啦。
銀行畀客嘅估價，係搵相熟測量行做嘅，由於呢啲係口頭查詢，冇估價報告出，測量行就唔可以向銀行收錢，咁咪變成得個做字囉。
上海樓市熱潮重升緊溫，當地嘅購買力不容小覷，香港上市公司廸臣發展嘅天然居，今日喺當地推出22幢兩層高獨立別墅，呎價1500蚊，但入場費500萬，最貴重要成1000萬㖭。
樓盤喺徐匯區嘅百色路，佔地近38萬方呎，建有22幢別墅同9座多層式住宅。別墅面積3077至4122方呎，附連花園同地下室。至於9座多層式住宅，其中8座已賣清，剩番一幢發展商保留做服務式住宅出租。迪臣副主席謝文盛估計，項目賣晒可以套現3.5億。
蘭西
電郵地址：
