「蝦王」系馬主、上市公司升岡國際主席劉錫康較早前同八方講，話去歐洲買咗隻新馬，九月運抵香港，代替已經退役嘅「正蝦王」。佢重連名都同隻新馬改埋，叫做「旺蝦王」，但咁耐都未見新馬到。
噚日八方喺電子展見到劉錫康，皆因佢間公司都有參展，於是問吓隻「旺蝦王」幾時見人，點知佢話，睇過隻新馬幾次，發覺佢始終唔係馬王嘅材料，所以決定撻定，再去愛爾蘭物色過另外一隻，年齡都係約莫兩歲左右，準備後年參加打吡；至於由沈集成操練，抑或入番愛倫馬房，暫時重未定。咁隻新馬會唔會叫番做「旺蝦王」？劉錫康話，「都未定，可能叫『叻蝦王』。」
劉錫康噚日重介紹佢位公子劉日東畀八方識，劉日東已經入咗爸爸公司幫手，做董事總經理助理，佢噚日回應傳媒提問，頭頭是道，劉錫康當然笑晒啦，佢重同八方講，個仔遲啲都會買隻馬返嚟養，實行學足老竇。
傳真︰2623-9278
電郵︰