響第37屆東京車展舉行前夕，日本本田車廠先後為旗下多個車款推出Facelifted新版，當中包括有Civic、Stream及S2000等等；及至最近，我哋又收到消息，話廠方快將會為備受用家追捧嘅大型MPV－－Odyssey，推出新一代型號，實行以前衞造型及出眾性能表現，去爭取更高市場佔有率。
新一代本田Odyssey嘅造型，摒棄咗原來成熟穩重嘅設計，取而代之會係既前衞又吸引嘅款式，明顯較前來得吸引之餘，相信亦能迎合一眾年輕車迷口味；其中一組扁長嘅頭燈，襯以全新鬼面罩組合，從而令車首造型變得極富魅力。至於車廂方面，則暫時未有進一步消息，但一般相信會與現有型號相類似，除空間來得寬敞、乘坐舒適性高之餘，車內座椅配搭亦見來得靈活多變。
機械配搭則預計會以馬力輸出分別係160匹，以及200匹嘅2.4公升直4偈作核心，並配以一套CVT無段變速或5前速自動波，性能表現相信會比現有型號來得更出色。據聞新車有望於年底前抵港，有興趣嘅車迷不妨拭目以待喇！