市況向好，上個月（九月）香港汽車代理商，共錄得1,742部新車銷量，較八月份嘅1,568部紀錄，再度有174部車嘅增長，係連續3個月錄得本地汽車有持續升幅；惟近期本地車市受到歐元及日圓持續高企影響，各大車行備受加價壓力，汽車銷量嘅升幅能否繼續，咁就要睇睇後市嘅反應喇！雖然富豪（Volvo）及現代（Hyundai）嘅代理權響九月底交接，令致兩個汽車品牌全月同時錄得零銷量紀錄；然而，響豐田、日產、平治及福士等品牌有明顯升幅帶動下，總計汽車銷量不跌反升，其中尤以豐田MPV類嘅Picnic同Previa最突出，而走高檔路線嘅凌志，全個九月亦錄得82部新車紀錄。至於歐洲品牌一哥嘅平治，雖然近期備受寶馬衝擊，惟E-Class銷量持續向好，截止九月底嘅頭九個月內，共售出972部新車，看來要睇吓新款寶馬5系，能否站穩陣腳抗衡喇！