港澳辦副主任喺北京，以主人訓斥奴才姿態，警告香港公務員：「食我碗飯，打我份工」，就要聽聽話話，唔可以唔「愛國愛港」，若果唔係，可以執包袱唔撈。
唔知係咪就嚟發射火箭，大陸好似啪咗丸仔，人人都好High，徐澤嘅言論，都幾古怪。首先，公務員食嘅係香港納稅人嘅飯，打嘅係六百萬香港人嘅工，好似唔係徐澤嘅菲傭、司機、花王，香港公務員食嘅嗰碗飯，按照《基本法》條文，係來自財政管理獨立嘅特區政府，唔係徐澤嘅工作單位港澳辦。
至於話，公務員要「愛國愛港」？咁相信公務員同全港市民一樣，都唔明點叫做「愛國愛港」。《基本法》23條喺7.1大遊行之前，阿董同中國政府，都話要「愈早立法愈好」，唔可以拖過7.1，民建聯話，沒有國哪有家。唔支持即時立法禁止顛覆，就唔係「中國人」。
7.1大遊行之後，面口又唔同晒。23條不但可以擱置立法，重可以連草案都撤銷埋，等到明年十月之後再講。如果公務員個個愛國愛港，今時今日係咪應該𠵱家集體遊行示威，堅決聲討譴責連愛國愛港都議而不決嘅阿董擱置立法23條，強烈要求，要即時立法，一日都唔可以再拖？
定係公務員食徐澤碗飯，打港澳辦份工，𠵱家反而要支持無限期擱置23條立法？如果𠵱家支持擱置立法，就係愛國愛港，咁7.1大遊行之前，死都話要即時立法嘅親中人士，包括民建聯嘅曾鈺成，咪變咗想害國家兼害香港？
「食我碗飯，打我份工」，呢亭對白，八方以為要喺凌晨三點幾時分，睇電視嘅殘年粵語片，惡家姑馬笑英，揸住支雞毛掃，叉起條腰，碌大雙眼，企喺柴房門口，指住個妹仔鄭碧影嘅額頭，先至會咁暴喝怒吼。就算係劇本對白，都嫌老土。
英女皇管治香港一百五十年，都未試過用英文透過繙譯喝斥香港公僕：Youeatmybowlofrice，yougetmymoney。
徐澤食胡錦濤碗飯，打溫家寶份工，去到盡，表現吓極左，博胡溫欣賞吓，呢一樣都好正常。不過，畀碗飯佢食、畀份工佢打嘅胡溫，講嘢都冇徐澤咁寸。
又係嘅，呢個世界，官位愈低，嘴臉面口，就梗係愈扭曲，好似啲大廈看更、停車場嘅「食Q」，永遠惡過立案法團嘅業主同商場老細，連監倉裏面負責通櫃嘅阿差，位微薪低，通櫃就特別大力啲，搵曾一哥，反為更加斯文啲，澤哥，好腥啲用力呀。
傳真︰2623-9278
電郵︰