美股周一升89點，噚日港股一開市，好友就將恒指抽高，大市升破12000大關，不過高位引發大量獲利沽盤，好友初時都重想守住12000關口，唔想恒指走勢太惡劣。不過，好友似彈藥不足，最後連11900都守唔住，恒指收報11856，倒跌105點，成交155.33億元。
不過，e莉莎仍睇好後市，話好友施展誘敵之計，旨在震走散戶好倉。阿虎則認為港股今次擺明係短期到頂，可能要調整幾百點，但港股長線升浪應未成。花旗美邦話現時計數獲利，離開股市似乎太早。阿虎十分同意，因為現時重未見到散戶瘋狂入市，港股亦未出現火箭升空現象。
積華生物（2327）招股超額認購，反應相當唔錯，但上市遇正港股挑戰12000關口失敗倒跌，唔少捧場客即刻沽貨離場，較招股價低2%收市，報0.48元，成為近期上市新股表現較差一員。黑客話，本來佢都想炒吓呢隻出爐股，奈何大市唔就，惟有等有心人收集完成後，重新開車時再捧埸。
神舟五號升空，刺激兩隻所謂航天股周一大漲後，噚日輪到神州數碼（861）大升9%，收報3元。不過，佢阿媽聯想集團（992）就跌2.4%，收3.425元。
最近傳出會德豐（020）唔會再對新亞（049）進行私有化，可能會將新亞股份派畀股東當特別股息。雖則現時樓市回升，要私有化新亞並非易事，不過派股畀股東，解決唔到集團結構複雜嘅問題。
阿虎