手頭上有幾封讀者來函，都係有關於教育嘅，讀者詢問如何轉科、轉大學、申請名校等等，當中有大學畢業生、大學生、中學生、中學生媽咪。諗落香港學生咁多問題，點解佢哋唔返學校問呢？反而要寫信畀左丁山呢？諗唔通，或者學校答覆過於官方，唔到肉啩？但係左丁山唔係學生教育專家，答問題要慢慢諗真啲，請讀者有耐性等吓先。
昨日講十五間名校專業學院嘅學生來源，《亞洲華爾街日報》發覺一啲細小liberalartscollege與名牌大學相比，毫不遜色。老實講，你想去哈佛讀法律，喺耶魯畢業就係比較穩陣；今秋進入哈佛法學院嘅學生之中，四十個來自耶魯，只一位美國學生得到聖路易華盛頓大學收錄，兼且獲得一萬三千美元獎學金，但佢嘅父母最後都係情願自費送個仔入哥倫比亞，原因就係自哥倫比亞畢業，考入名牌專業學院嘅機會大好多，事實上，喺《華爾街日報》feederschool排名之中，哥倫比亞排第十一，華盛頓大學（私校，最佳大學排名好高）竟然不入前五十名。
博雅書院之中，最出名嘅WilliamsSwarthmore都名列前茅，左丁山完全唔識嘅Middlebury、BrynMawr、Bowdoin、Haverford、Grinnell、Reed等都係前五十名，讀呢啲小書院，完全冇蝕底，柏克萊都只係排名第四十一咋，UCLA入唔到榜㖭。不過話時話，如果畢業後返回亞洲打工，讀小書院就冇人識咯。