繼T610之後，班索記Fans都餓咗好耐，所以自從SonyEricsson公布推出Z600之後，好多用家都日夜期盼。而呢部索記機王上星期初終於都有水貨入場，不過數量當然唔係多，所以第一輪貨話咁快半日就俾人掃晒，到早兩日又有第二輪貨，而且最開心就係價錢冇炒到飛起，開價都係$3,980。雖然成個場都係得一間有貨，不過舖頭位哥哥仔話唔炒都咁貴，到時冇人買坐艇咪重濕滯，相信索記Fans聽到呢番說話肯定係最開心嗰班！
查詢：23987320（鉑匯科技）
索記除咗Z600水貨到港之外，同場都重有個HBH-65藍芽耳筒，外形就同之前嘅HBH-60一模一樣，不過耳筒顏色就轉為藍色，備用時間同樣為70小時，HBH-65到貨唔夠兩日，反應係點就重未知，不過同場Nokia亦有新藍芽耳筒出場同場較量。呢款HS-3W喺上次6600發布之時都曝過光，比索記嘅藍芽早幾日登陸香港，店員就話反應相當唔錯，一日都可以去到幾隻，不過羅新基覺得最主要都係價錢平，$628就有交易，比索記隻HBH-65嘅$980差唔多平成半，先吸引到唔少人入市。
星匯電訊：23902680（HS-3W）
匯達：24131883（HBH-65）
Smartphone向來都係主打行政人員市場，因此好重視文字輸入方式，以方便寫E-Mail或SMS，但係若果裝鍵盤又會令到手機體積暴脹。一間名為SierraWireless所推出嘅Smartphone，就一於採用類似Nokia6108的揭蓋方式，不過今次就係向左揭，兼且內藏英文字鍵盤，不過仍稍嫌大部，未必為港人所接受。
記者：羅新基
