英國作家詹姆斯．希爾頓（JamesHilton）曾經寫過一部著作《失落的地平線》，書入面所描繪嘅世外桃源，大家認為係位於雲南嘅香格里拉。
楊千嬅上個禮拜終於見識過呢個桃源，佢同任賢齊喺雲南呢個著名景點拍《花好月圓》，不過對住咁靚嘅地方，兩位主角都冇心情欣賞，皆因佢哋喺接近海拔三千呎嘅高地拍戲，嗰度空氣稀薄，搞到成組人拍到頭暈暈，千嬅一埋完位就要瞓低戴住氧氣罩，人哋嚟呢啲地方就想吸吓靈氣，點知千嬅同小齊就吸氧氣，真失禮。
千嬅同馮仁昭喺電話講：「香格里拉真係靚到飛起，𠵱家我知乜嘢叫世外桃源，可惜喺咁高嘅地方拍戲，個頭痛到死，又係咁嘔，但因為趕戲，成組人都頂硬上，我一埋完位就吸氧氣，你話重邊度有心情觀光呀！」
梁詠琪（GiGi）噚日去商台做訪問，佢有份做政府搞嗰個維港巨星騷，講到唔少歌手都不滿好似被分咗等級咁，港星就淨係得車馬費，啲外國歌手就貴一貴都請，GiGi話：「其實我都唔係好知啲是非，但係我都答應咗做，而且都係為政府做嘢，大家都係想幫香港，所以我都冇乜所謂。」GiGi做咗傑青後講嘢都真係唔同啲！
鄭伊健日前去咗韓國為電影《雙雄》做宣傳，佢重搞咗個fans聚會，可能啲韓國fans少見伊健，唔只特別熱情，重好豪氣，送咗好多禮物畀伊健㖭，有LV銀包、手提電話同埋韓國禮服等等，唔怪得伊健嗒晒糖，重大讚話：「佢哋靚過香港嘅女fans，重好鬼熱情。」
唐麗球喺上星期六生咗個女，佢同老公吳毅將決定夾好時辰八字再同個女改名。唐麗球喺電話話，生BB個過程好辛苦，但當抱住個女一刻乜痛都唔記得。頭一日佢已經好想見個女，不過都係生完第二日先有得見，好彩老公有將生產過程拍低，唐麗球話暫時決定餵一個月人奶先，順便幫吓收身。
陳果幫「母親的抉擇」拍咗條廣告短片，噚日佢喺銅鑼灣出席記者會，佢話呢份工好少錢，真係當做善事。至於佢搞咗好耐嘅電影《潮州巷》，啱啱寫完劇本，之前話男女主角係古天樂同天后鄭秀文，不過部戲成本千萬，已傳出鄭秀文片酬佔咗一半，所以演員要等老闆決定。陳果話以前拍戲用新人乜都自己話事，𠵱家用卡士就冇咁自由，下下都要就演員期。
五人組合SKY噚日喺灣仔拍攝「AND-1」籃球運動服裝廣告，合約為期一年，酬金有六位數字，重有免費波鞋着㖭。成員中嘅Gilbert（後排中）原來係大腳八，要着十三號鞋，咁大隻腳，可以揀嚟着嘅鞋款唔多，所以每次有贊助波鞋，都唔使同其他成員爭，不過佢哋都好禮讓，唔會因為咁傷大家感情。
