一鑊沙士災難，唔只加深港人同阿董政府嘅分化，重加速咗愛國陣營嘅分裂，五十萬人遊行，國家「屍爬」救港，曾副主慶紅喺中南海上位，國家將阿董擺埋一邊，直接會見富豪工商專業團體收料，話沙士呢隻病毒，改變咗香港嘅歷史，正如鼠疫，改變咗歐洲文明嘅發展方向，並無誇張。
沙士搞到阿董頭大，儍強頭赤，𠵱家，以港區人大代表鄔維庸為首嘅專業親中派，同以民建聯曾鈺成為核心嘅傳統土共派，就應唔應該立法會專責委員會獨立調查沙士責任嘅問題，紮馬對晒抗。
曾主席嘅民建聯，七一已經勁衰一鋪，若然連沙士問責都唔支持，放過儍強一馬，自己又點樣面對區議會同立法會選舉？今次再大膽，都唔敢保皇，若然唔係，三百條冤魂嘅親屬，喺投票日集體遊行，民建聯就唔使選，因此只好借儍強人頭一用，亦借阿董膊頭上棟，支持立法會獨立查沙士。一日都係肥彭陰毒，臨走推行政制改革，做埋姑爺仔，誘姦咗民建聯，令到民建聯跌咗落民主政治嘅火坑，為咗選票，冇法子唔六親不認，連阿董都要焗住冇面畀。
但民建聯猛嗌支持立法會調查，始終都唔夠鄔大代聲大。人哋鄔大代個醫生公子，今次喺沙士之中亦掹掹緊執番條命，鄔人大係沙士直接受害人，難得有咁嘅偉大胸襟，第一個反對追究責任，放過儍強同阿董，重大罵主張問責者大搞復仇，而政府賠償，亦係浪費公帑。
論到道德上嘅說服力，自然係阿鄔大代勝一籌，明明自己個仔都因為醫療制度粗疏而中招，咁都可以話唔應該問阿董追究賠償，咁偉大嘅人格，高尚嘅情操，只有喺韓戰時期，個親生仔俾美軍炸死，後來為咗中美關係同世界和平，又可以主動邀請尼克遜訪問中國，同美帝修好嘅毛伯伯可以相比。
手板係肉，手背又係肉。鄔人大唔使企街派傳單，唔使揸住喇叭筒叫街坊投自己一票，又點知民建聯嘅痛苦。追殺沙士責任，最終一定要儍強人頭落地，曾主席本身都係行政會議成員，同埋儍強搭埋一隻爛船，自相殘殺，邊個想？不過中央有命，既要挺董，又要挺民建聯，曾慶紅又同姓三分親，呢輪姓曾嘅當旺，連曾蔭培領取Madein特區嘅塑膠汽水蓋，都笑得特別自豪，睇嚟儍強返頭再落鑊，阿董親去立法會受刑，由民建聯葉國謙親自將支燒紅嘅辣雞，辣落阿董肥胖嘅心口，阿董慘叫，曾主席心中默默流淚，睇嚟都勢難避免。
係阿董嘅民望重要，定係民建聯選票重要？呢頭吹雞叫民建聯谷盡挺董，嗰頭立法會就實淪陷，為今之計，就係畀曾鈺成喺立法會聲淚俱下咁叫儍強落台，再由儍強鞠躬應允，犧牲儍強，將佢變為一碟馬來炒貴刁，分畀飢寒怒交迫選民，唔好畀八方講中！阿董懵盛盛，又衰一鋪。