今個禮拜最熱潮界話題係勞力士最近出嗰隻50周年「深瑪溫拿」，正當大家討論緊隻表炒到幾錢同有幾多貨返嘅時候，潮流搞手「教父P」被雜誌影到佢原來早已手戴一隻，相信佢係全香港最早戴綠色「深瑪溫拿」其中一人。報道出街後，好多人立即打上香港勞力士總公司問，隻表係咪返咗貨？聽講啲表迷非常緊張，十足十當年排隊認購科技股咁熱烈。不過香港勞力士仍保持神秘，唔肯多講隻表返咗幾多貨。大食JACK只好四出收風，集幾位表界線人資料所得，聽講香港暫時只獲分配十零隻咁上下，基本上一般街客都冇乜機會買到。聽聞定價近三萬左右，炒價約四萬至四萬五。𠵱家好多人都等緊重有冇水貨返？巿價波動，要買不妨睇定啲先，聽講呢隻表偏向炒短線。
文：大食Jack