約方力申去其至愛食肆，他首推位於北角七姊妹道的《新‧水餃姨姨》。乾淨的門面、沒有一般小店的滿門餐牌，老實說，店面不小，卻不是太顯眼，起碼不及同區一大堆風味老店吸引。推開門，準備迎接一臉慈祥的「新‧阿姨」時，只見二十歲未夠，一身蒲Look的「𡃁妹」，抱住粉糰笑着彈出：「姨……姨？」「我係呀！」
記者：陳慧敏 攝影：梁細權、陳盛臣
快手包餃：
$13/5隻$24/10隻
即包即食韭菜餃由《水餃姨姨》傳授，阿茵：「水餃係表姐教我哋包嘅，所以餡料比例我哋會跟足。好似韭菜餃菜肉比例係1:1；津白就要７:2喇。」
正宗北京人小方（方力申），鍾意食饅頭，還愛跟爸爸一起食蒜頭撈麵，不過工作關係，總不好意思開口發放蒜味炮彈，所以食餃子成為小方至愛。自言由北京吃餃子吃到來香港，講功架，方媽媽始終天下無敵：「我媽媽整嘅水餃真係勁好食㗎，連麵皮都自己搓，不過媽媽懶，水餃Size起碼係一般水餃嘅兩倍，我一個月起碼食兩次。」不過工作關係，媽媽的餃子不是時時有得食，惟有周街搵食止癢。小店今年5月開業，小方已經來過不少次，還跟兩位年輕老闆熟絡起來：「呢度啲水餃皮薄又彈牙，但又唔易散，重有好多菜㖭，我最鍾意食菜。」剛吞下口中的韭菜餃，筷子已攻向桌上白菜鍋貼。
剛剛畢業的阿茵跟哥哥兩個都是二十歲出頭，表姐經營《水餃姨姨》譽滿港島，遂決定拜師學藝。雖然專誠請來北京師傅坐鎮，但兩兄妹仍落手落腳，妹妹專修「快手包餃子」，哥哥負責「改良新菜」，開店兩個多月就已經有一班固定熟客，上星期就有客人突然要求即包餃子400隻，作開Party之用。阿茵苦練兩個月，400隻餃子、兩小時即能交貨。然而旁邊負責粗炒的大佬爆料，阿妹每次開壇，全店都屏息靜氣冇人敢嘈，阿茵睩大眼話：「係呀！我包餃子時好專心㗎！你哋唔好喺側邊嘈住我呀！」包餃時間為每日下晝3點下午茶時間，只要你不要口多多「聊」包餃中的阿茵傾偈，包你食到即包即食靚水餃。
由表哥手中傳得的粗炒秘方，連麵條都專登訂做，比一般吃到的更煙韌，然而哥哥勇於創新，將平時懶落街，在家將配料左搭右搭又一餐而「撞出」的新口味搬進店裏，有海鮮醬及肉碎加料，鮮味倍增。
講北京小食怎少得了泡黃瓜？很多人都以鹽水泡黃瓜，可保持黃瓜新鮮，這裏卻寧願揀黃瓜時挑剔一點，有籽的不要、切開顏色不鮮的都不要。怪不得切成小丁的黃瓜粒粒爽脆，只嫌筷子功拙者，吃着吃着有點累。
傳統口味的烤麩比較乾身，這裏以竹笋、冬菇和雲耳一起燜，軟軟麵筋像海綿一樣，吸滿了甜甜的醬汁，營養豐富又有嚼勁，你總忍不住再來一口！
新‧水餃姨姨
地址：北角七姊妹道健康村二期地下12號舖
電話：28119509
營業時間：平日11:30am-10:30pm；星期日3:00pm-10:00pm
除了去《新‧水餃姨姨》可吃到後生仔創業靚水餃外，走幾步過馬路，還找到老一輩的兄妹生意—香港買少見少的竹升麵佳記！這家做盡34年街坊生意，星期日及公眾假期休息的老麵店，除了依然用豬油煮食外，還堅持用竹升「跳」麵，打出來的麵才夠韌又夠爽，連雲吞的餡料都是人手剁碎。
由順德運來的南乳，味道和顏色都比一般南乳Sharp，經秘製後更勾起一陣甜味，少了那股嗆鼻的鹹，跟豬手燜得軟腍腍，用來下酒最好！
於「大」就是好的風潮底下，手製雲吞仍保持一口一個易食Size，除了鮮蝦及豬肉外，還加了竹笋和木耳，可謂少見的清爽口味，為的是配合區內老人家口味！
佳記
電話：25641107
地址：北角七姊妹道205號
營業時間：星期一至六11:00am-12:30am；星期日休息
