何志平局長最近少咗同明星老婆胡慧中齊齊亮相，但就有好多報道話佢太座入市買樓，幫襯小小超買咗間貝沙灣。胡慧中以前係銀幕純情玉女，鍾意行沙灘、睇日落、吟吓詩，貝沙灣好夠台灣文藝片氣氛，唔怪得氣質清純嘅何太，一見貝沙灣就歡顏，呢啲就叫做品味嘞。
八方早前見到何局長，掛住追問佢滾石單嘢，唔記得問佢點睇樓市，噚日再搵人追問，點知答案一樣，佢唔理亦唔知太太有乜嘢私人投資，問佢鍾唔鍾意貝沙灣啦，又係冇答案。
翻查資料，何局長原來同太太共同擁有一間位於半山花園道愛都大廈嘅豪宅，但係較早前佢將自己嘅股份轉到父母嘅公司名下，佢有份嘅房產就重有南灣一個用嚟收租嘅單位，另外東莞亦有一間屋，就係咁多。
何局長咁公私分明，識得走位唔答，唔怪得到今日都未有點樣行差踏錯，連大年初二喺車公廟求到支下下籤都冇事，重俾人話佢夠神心，啲好似沙士咁嘅衰嘢中晒，真係靈㖭。
（圖）有報道話胡慧中買咗間貝沙灣，但係何志平就話唔知喎。
傳真︰2623-9278
電郵︰