唔玩纖體玩塑身
柏芝重演《人鬼情未了》一味靠索

張栢芝最近經常以性感打扮出席公開場合，為纖體公司展現苗條身段。在今次纖體廣告中，栢芝刻意大騷她一對長腿，更模仿西片《人鬼情未了》大玩製陶瓷。

身形瘦削的張栢芝最近為卓悅纖體美容中心拍攝一輯纖體電視廣告，拍攝當天，栢芝身穿性感白背心及短褲，盡騷她一雙長腿，更模仿西片《人鬼情未了》製陶瓷的經典場面。

「好滿意自己身材」
栢芝今次擔任纖體代言人，除收取七位數字酬金外，同時可免費做任何護膚及瘦身療程。栢芝昨日接受電話訪問時說：「我𠵱家對自己身材好滿意，初入行時真係肥妹仔一名，不過開始去纖體公司做療程之後，結實咗好多，應大就大，應細就細。」

拒為纖體行性感
問栢芝會否因擔任纖體代言人而刻意作性感打扮？她說：「着衫係配合番季節，咁夏天就梗係着背心同短裙，性感啲，絕對唔會因為接咗個廣告就刻意性感。」
栢芝已相當纖瘦，問她還有甚麼部位需減肥？她說：「其實今次個廣告口號係塑身，唔關肥瘦事，要有完美體態，肥同瘦都要塑身，所以其中有一段造陶瓷戲，就係要帶出人體線條都係造出嚟，我覺得個意念唔錯。」