家住得很近醫院，從來不覺得這是一個賣點，因為多數去親醫院都冇乜好嘢。上次深夜在家弄消夜開易拉罐午餐肉時錯手把手指剖開一道大縫，當機立斷立即二話不說着住背心短褲，趿住拖鞋，好似標童一樣緊握手指傷口高舉過頭，雙腳風車般飛快跑到醫院急症室，可惜護士並沒有因為我是街坊而有優待，一樣要等一大餐才得到醫生縫針，在等的期間，護士嬸嬸鬼咁好傾：「乜咁夜好肚餓咩？重開罐頭？開咩罐頭呀？啊，午餐肉，乜午餐肉好食咩？」既然問到午餐肉好唔好食，惟有就算一手係血都寧願到急症室外抽根煙等醫生嚟。
日前，終於發覺住得近醫院，都有好處，好朋友頭一次做老竇，在妻子入了產房後才記起忘記帶相機，連忙致電給我求助：「冇問題，五分鐘內送到。」相機及時趕到，捕捉了動人的一刻，好朋友成個外父相，果然一索得女，喜孜孜的告訴我母女平安，孩子長得像母親，由於未足月所以長得較奀，但身體健康，手指腳趾瓣瓣齊全，好朋友一直扮不擔心，看得出此時才真正舒一口氣。最令人開開心心到醫院的原因一定是探訪新生嬰兒，大人都聚在玻璃前對着小生命指指點點，令我想起跑馬地的寵物店。好朋友望住個女，笑得瞇起對眼，兩條眉戚吓戚吓重𠵱起棚牙，有這樣奇怪的慈祥笑容，應該會是個好父親吧！