賭波合法化兩個月以來，好似都冇乜大問題，馬會主席夏佳理當然要領首功，但係人人都知呢單嘢嘅大功臣係民政局肥佬平得力馬仔余志穩，佢有四分一英國血統，做起嘢，有英國佬嗰鋪認真嘅脾氣，當年日日夜夜落區，重勤力過啲議員，八方日前見到佢老哥，問佢重有乜嘢新玩法，點知佢一味耍手話唔再關佢事，問馬會先知。
八方梗唔放過佢，追問種族歧視單嘢搞成點？皆因呢件燙手山芋又係佢負責。余志穩人如其名，非常淡定咁話，呢單嘢比較複雜，但都做緊，明年先嚟一份諮詢文件，大約一月頭出籠，叫八方等吓。
睇余志穩鬼鬼哋個樣，冇乜嘢會難到佢，雖然八方一直都認為，香港比起其他國家同地方，種族歧視並唔嚴重，只係有啲口頭禪例如黑鬼、阿差、鬼頭呀咁，叫慣叫熟咁多年，係親切活潑、鬼馬呢種說法，屬於《基本法》規定五十年不變嘅生活方式之一，唔係歧視，余志穩穩重啲好。
傳真︰2623-9278
電郵︰