搵方辛加做經理人
球驗客手記：查斯古特傾續約有計

睇開意大利波嘅球迷應該唔會對方辛加陌生，唔講唔知，原來呢位舊年響科木靜靜雞退休嘅烏拉圭前鋒轉行做球員經理人，最近重代表老友查斯古特同前屬球會祖雲達斯傾續約條件，認真巴閉。
據講，方辛加退休之後跟住個專做意甲轉會生意嘅經紀卡沙爾，勢力範圍覆蓋大部份南美洲國家，方辛加泊到好碼頭，想唔發至奇。查斯古特響阿根廷出世，據講佢爸爸同卡沙爾有啲交情，於是搵卡沙爾幫手搞續約。卡沙爾見方辛加同祖雲達斯有一定關係，於是就搵方辛加擔此重任。
查斯古特重未同祖記續約，講到尾都係想加人工。不過方辛加要同數口精明嘅祖記總監莫治周旋，掂唔掂檔重係未知之數。

西乙聯秋風起和波肥
前日梳打埠大莊有開盤嘅比賽「和」風勁吹，女子世界盃決賽法定時間和波，最厲害係八場西乙波有七場賽和，如果計埋上星期六嗰三場，十一場波和咗十場，隨意揀中幾場串過關已經發到豬頭。講時講，呢輪多和波，更新西乙積分榜認真方便，至少排名唔使大改。

白賴仁笠臣勉強自己教非洲鷹
白賴仁笠臣任教尼日利亞國家隊，消息傳出後自然成為新聞焦點人物。日前佢接受訪問時承認無國內大球會搵佢教波，令佢好傷心。鬼叫呀「神奇隊長」當年教米杜士堡唔成功咩，望就望佢幫尼日利亞攞到個好成績，作為重返英超執教大球會嘅跳板啦。

女子世界盃決賽欠「激情」篇
我求大俠響前晚睇住場女子世界盃決賽，除咗因為戰況有睇頭外，梗係想知贏波球員會唔會學似男子咁激情盡現，解除束縛……。果然當電視影住德國女將慶祝時，響側邊嘅佩蓮絲掀起上衫，似乎想露本錢，可惜嗰位攝記唔識做，無即刻zoom近啲，等我捱住眼瞓最後都食唔到冰淇淋。

戴維斯倫敦搞事有「陰謀」
荷蘭中場戴維斯早幾日去倫敦小休，好揀唔揀入住幾個英格蘭球員涉嫌輪姦少女嘅酒店，而佢同國家隊隊友哈索賓基就響一間俱樂部同人發生爭執，俾英國傳媒影晒。呢次戴維斯響倫敦惹麻煩，有人話係佢特登搞事，等祖記快啲同佢分手，呢個講法成唔成立，就由閣下判斷啦。