新車速報：<br>富士Legacy2.0GTSportsWagon滿載活力感

新車速報：
富士Legacy2.0GTSportsWagon滿載活力感

日本富士汽車代理，繼早前運嚟全新Legacy2.0GT四門高性能房跑車，予人一新耳目之感後，近期佢哋又引入埋一部五門掀背嘅SportsWagon型號，外形同樣教人有個性同獨特感外，多變嘅尾廂鋪排，加上近乎天幕式玻璃車頂設計，以及2.0公升Turbo偈同恒式四驅配搭，又豈止一般RV可媲美呢！
記者、攝影：陳偉林
ImageGirl：Samantha

富士Legacy車系向來走高性能路線，並得一班車迷追捧，而當中屬五門配搭嘅SportsWagon型號，更一直不乏支持者捧場，皆因佢有一身高性能演繹之餘，寬敞又多變嘅車廂組合，既實用又切合RV要求，連帶香港嘅用家亦好接受㖭！

■幾近天幕式電天窗配搭，有親近大自然嘅好處。

■全新鍍鉻面板嘅中控台，裝有原廠恒溫冷氣、MD連CD高級音響，還有頂置儲物匣。

外形出類拔萃有瞄頭
至於呢部全新LegacySportsWagon，跟早前四門房車版大致相若，惟伸延嘅車體及尾廂，完全未有予人笨拙感，又不失優美輪廓，加上車尾頂置有尾翼連High-mount煞車燈，就連一對全新多盞式LED尾燈兩旁，亦分別置有倒車燈同LED霧燈編排，整體看來斯文中帶出一份跑意，自然容易為車迷受落啦！

■兩邊門鏡附有方向指揮燈，奪目又吸引。

■全新鬼面罩連氣霸配搭，予人惡形惡相感。

■全新LED尾燈旁新增有霧燈，既安全又有一份吸引性。

■高置尾定翼連High-mount煞車燈，既有穩定作用又具安全感。

天幕式玻璃頂享受至高
講到車廂，兩排雙色高級絲絨椅配搭，感覺空間好闊落，尾排椅背除可以左右獨立調校角度，遇有需要時重可以整幅收摺，令尾廂容量倍增外，原來尾地台下重置有儲物匣，方便擺放雜物㖭！然而，最教人喜出望外會係一個近乎天幕式嘅大型電天窗組合，予人跟大自然有近距離接觸之餘，響寧靜座艙享受恒溫冷氣嘅透心涼意，以及一套講究嘅原廠MD連CD高級音響裝置，既愜意又舒適呢！

■雙出式尾喉裝置，有助引擎高轉時呼吸暢順。

■全新座艙陳設時尚又見High-tech感，還烘托出濃厚跑車味道。

車重平均操控了得
至於引擎配搭，新車跟早前四門房跑車型號一樣，採用一台2.0公升水平對向四汽缸Turbo新偈，匹配埋5前速半自動波及恒式四驅，雖然車體較上一代尺碼稍大，惟車重只較四門版多出20kg，皆因頭冚用上輕巧鋁合金鑄造之餘，五門版嘅尾廂重用上大量塑材模造，因而令車重只有輕微上升，兼且重有更出眾嘅前後車重，令高速拐彎仍見有頗高循迹力㗎！

■尾排可完全收摺放平，而尾廂地台下重有儲物匣組合。

■全新三幅式跑車軚環，兩旁附有+/-半自動波按鍵。

■尾排可完全收摺放平，而尾廂地台下重有儲物匣組合。

■全新三幅式跑車軚環，兩旁附有+/-半自動波按鍵。

■一套全新5前速半自動波，轉檔敏捷又順暢。

Samantha評語：尾廂夠大又多變
前後兩對頭尾燈有型又見吸引，想唔到個尾廂空間咁大重有多變組合，置身後排仰望天幕式玻璃車頂，欣賞初冬下嘅夜景，真係好好Feel㗎！

記者評語：性能表現狠辣有勁
新車造型跟早前四門轎車版相若，惟加長咗嘅車身，匹配五門掀背外形，別有一番獨特性及高性能SportsWagon氣息；起跑加速強悍有力，又不失操控性及舒適感，教人留有動靜皆宜嘅好印象。

■頭冚以鋁合金模造，既輕巧又堅固。

富士Legacy2.0GTSportsWagon規格
引擎：1994cc水平對向四汽缸DOHCTurbo
馬力：260ps/6000rpm
扭力：35.0kgm/2400rpm
傳動：5前速半自動波，恒式四驅
懸掛：（前）麥花臣支柱
　　　（後）多連桿
制動：（前）透氣碟
　　　（後）透氣碟（ABS）
輪胎：215/45R17BridgestonePotenzaRE050A
尺碼：4680×1730×1470mm
軸距：2670mm；車重：1460kg
平均耗油：13.0km/L
新車售價：$398,000
車輛提供：意美汽車（23968380）

■低地台低腰線設計，若要提存尾廂行李，均見方便就手。

■新車用上一台2.0公升Turbo偈，匹配電子恒式四驅，加速狠勁重有出眾操控演繹。