立法會一開鑼，大家不愁寂寞，特別係董建華，就算佢幾唔鍾意班成日倒董嘅議員，都要去出席答問大會，任人質詢。呢個星期嘅好戲就正正係周四嘅立法會特首答問大會。八方聽聞，特首辦視此為本周特首最大事，現正全面同佢老人家備戰，包括估吓班民主派議員會有啲乜尷尬問題想問老董，然後準備貓紙等佢到時發揮，既然老董7.1之後嘅策略係以和為貴，咁就無論班議員質佢乜，佢都只好微微嘴笑，乜都話會研究，會考慮，會聽民意。
至於班尊貴議員，就大把彈藥，只怕冇機會問啫。指定問題係政改幾時先諮詢，幾時先可罷免啲無能嘅特首，其次當然可質詢點解偏袒少爺強，唔使佢問責下台，接着又可以問阿爺會唔會嚟立法會接受質詢，重有當然係填海單嘢點搞，河套加工區又係乜料。
如果你畀八方坐喺裏面，梗質問佢究竟𠵱家係佢話事抑話北京作主。
（圖）特首辦主任林煥光為董建華周四答問大會傷腦筋。
傳真︰2623-9278
電郵︰