雷諾Megane車系自推出以來，一直備受各地車迷追捧，而且重榮獲「CaroftheYear2003」嘅榮銜㖭！最近，廠方更宣布會為其推出RenaultSport強化跑車版本，並以雙門跑車形象示人，實行與其他同級對手對着幹咁話。
呢款名為MeganeRenaultSport嘅全新雙門跑車，造型設計雖與現有普通版Megane相近，但原來廠方已為其換上全新頭尾泵把、雙出式跑車尾喉及18吋跑車合金胎軨等組合，從而令造型變得更富活力感；至於車廂配搭方面，亦見與普通版本相近，但響設備配搭上卻略有改動，如換裝上金屬跑車腳踏、全新跑車座椅，令人望落亦見有一份吸引力。然而，廠方將會為MeganeRenaultSport配用一台2.0公升Turbo偈，馬力及扭力輸出分別為225匹及30.6kgm，匹配一套6前速手波，性能表現絕對毋庸置疑；同時，新車制動系統亦被強化，除換裝上頭輪312mm透氣煞車碟及後輪300mm煞車碟外，其中頭輪煞車碟更用上四活塞卡鉗設計，制動表現明顯來得更強，予人十足信心。
有興趣嘅你，不妨耐心多等一會喇！
