老一輩人都說，廚房是男性禁地，煮菜只屬女人工作。不過，今時今日講男女平等，男仔都可以下廚煮幾味。出道兩年的歌手周永恆（Roy），做過電影《六樓后座》中的怕醜仔，又會在今個月上畫的電影《少年阿虎》中擔任一角。唱歌演戲了得的他，連入廚都掂。今次他用自己最愛吃的呍呢拿雪糕，配以新歡羅望子茶，示範兩款特色甜品，簡單易做，連Fans都讚好。
記者：羅惠芬
攝影：楊錦文
場地提供：CentralServiceOffice（31950808）
外形極細路仔的阿Roy，自言識煮菜是迫出來的。自小跟父母弟弟生活的他，一日三餐均由母親負責，自己就蹺埋雙手等食。
自搬家過獨居生活後，既缺少了媽媽的愛心菜，又忍受不了街邊的味精菜，阿Roy開始懷念食住家飯的好處，終於的起心肝，買本烹飪書學煮幾味。由雞手鴨腳到學識拎起鑊鏟，只花了數個月的時間。「兩餐都係靠煮意粉和炒公仔麵，整得多成績自然好，有餐廳水準㗎！」
小朋友最嗜甜，只得19歲的大細路阿Roy也不例外，買了幾本甜點書自學，甜品、飲料都愛整。最愛甜品是雪糕，差不多天天吃。不過，阿Roy吃雪糕的方法好特別，唔鍾意齋食，每次都要整色整水玩新鮮，日日食也不厭。「其實煮並不難，最麻煩的是清潔工夫，家裏的杯碟積幾日都唔想洗。」
阿Roy最愛食呍呢拿味雪糕，皆因「佢味道最簡單，容易配搭。」他早前發現的羅望子茶，味道酸酸甜甜，佢就靈機一觸，用來煮汁做雪糕配料，不但夠創意，更將雪糕的甜膩感減低了。
用咩料：
呍呢拿雪糕200克、羅望子汁3湯匙、羅望子肉50克、白砂糖2湯匙、牛油1茶匙、Mayer'sRum甜酒1/2湯匙、檸檬汁少許
小貼士： 煮砂糖時切忌用猛火，而且要邊煮邊攪拌，以免煮焦。
「細個阿媽唔畀食甜嘢，怕爛牙。最大獎勵是一杯雪糕新地，節日才有得食。」所以阿Roy對雪糕新地特別情有獨鍾。今次他加入蘆薈肉和羅望子肉，兩者都含有大量纖維素和維他命，食多點都不怕。
用咩料：
梳打水180毫升、羅望子茶150毫升、蘆薈肉100克、羅望子肉少許、呍呢拿雪糕50克
