香港人四季皆愛吃火鍋，碰着今日秋涼天，圍爐而吃更滋味，可是亦布下一個肥美可口的陷阱。要食得健康，就要剔出致肥分子，齊來EAT'NBURN。
記者：邵超 攝影：陳盛臣
模特兒：Joey、Christine、Debby&Julian（SunSpot）
營養師金句：
「食火鍋嘅口訣係：『先飲湯，後加菜，再食肉』，但最重要都係食五穀類打底先食其他材料。」
怡生註冊營養師 劉立儀
回想一下平時吃火鍋的習慣，伸出筷子去夾的第一款火鍋料是甚麼，答案必然是肥牛及丸類，而不是芋絲、烏冬等。
「底層嘅食物唔能夠太遲食，最初食少少粟米、芋絲打底，慢慢再食其他，就唔會食得太飽。」
金字塔的底層主要指五穀類食物，予人很滯的感覺，一般人不想「執輸蝕底」都會把這些食物留到最後吃，這樣便會踩中陷阱。其實全穀類的食物含纖維素，既可飽肚，又可降低身體吸收膽固醇及預防便秘。
「食火鍋嘅次序，可以按金字塔由底層一直食上去。」
都是湯底惹的禍，讓火鍋迷吃不了多少，便已吸收極高熱量。
「食火鍋各有好壞處。火鍋係一種健康嘅食法，白灼食物，唔似中式小炒咁泡油，所以關鍵就喺所謂集百家精華嘅湯底……火鍋湯底唔同日常滾湯或煲湯，長時間一齊煲滾大量嘅肉類、菜蔬、海鮮等，會產生高濃度嘅普林，繼而轉化成尿酸，呢啲尿酸喺血液中沉積，會增加痛風症患者病發嘅機會，對一般人亦有害處。即使不斷加水，尿酸反而愈積愈多，少喝為妙。最好嘅湯底是清湯或上湯，或芫荽皮蛋或魚片湯就最好。麻辣、沙嗲油份重，退而求其次可選鴛鴦鍋。」
健康與火鍋，欲魚與熊掌兼得，劉立儀說未必無辦法。
「火鍋嘅壞處主要嚟自於同一日內食太多肉類，吸收過量蛋白質，其實可以喺同一日做飲食調節。例如約咗晚黑食火鍋，午餐嘅食物就可以選擇清湯粉加油菜，或麥包加生果，亦可以食雜菜沙律，整日嘅營養先會均衡。另外，進食期間嘗試慢慢食，雖然對有啲人嚟講係好困難，但可以幫助控制食量。」
火鍋金字塔
鍾意食火鍋又怕肥？只要按着怡生註冊營養師劉立儀砌出來的健康火鍋飲食金字塔，便可以食得健康又痛快：
最高層（少吃）：生根、豆卜、肥牛、貢丸、豬肉丸、公仔麵
有解：所有經油炸處理、肉與脂肪不能分開的肥肉，膽固醇和脂肪含量極高，少吃為妙。
第二層（適量）：豆腐、枝竹、腐竹、帶子、蚌、龍蝦丸、墨魚丸、魚蛋、瘦肉、牛肉、鯇魚片
有解：肉只要能肥瘦分家亦可吃，不妨以海鮮和魚肉代替。丸類以龍蝦丸最佳。
第三層（多吃）：金菇、冬菇、菜
有解：菇類和深綠色的蔬菜營養特別豐富，多吃有益，中和肉類的滯膩感。
底層（主食）：粟米、芋絲、粉絲、烏冬、米線
有解：五穀類的營養最豐富，先吃少量打底，避免吃得過量。
疑團１：有人話菜反而係最高熱量嘅火鍋料，因為會索晒肉料嘅油份。
劉：任何火鍋料都會吸收湯汁，若因為咁樣而唔食菜，反而適得其反。
疑團２：食火鍋時，點解唔適宜飲酸梅湯？
劉：酸梅湯、啤酒、汽水都係額外嘅卡路里，一杯酸梅湯就有190卡路里，飲水最好，如果嫌口淡，可以叫無糖汽水或熱茶。
疑團３：老人家話醬油加蛋可以清熱氣，啱唔啱？
劉：小朋友、老人同腸胃唔好嘅人，都唔應該食生蛋。蛋有沙門氏菌，一般要煮熟後先可以殺菌。若一定要撈汁，可以揀辣椒仔、豉油加少量清湯，或者加芫荽都可以。
