曾一哥上星期威到盡，由老董親自同佢掛上金紫荊星章，重抱住個孫女映番張靚相留念，但佢喺金碧輝煌嘅背後，即是風光大退，就快返屋企湊孫。
原來根據警隊嘅一貫規矩，一哥做到五十七歲就榮休，由年輕有能之士接棒，但係自從老董做咗特首之後，事事慢半拍，上次許淇安話走，老董死都唔肯放，搞到許一哥要多做三個月，最後差唔多要自己宣布唔撈。呢次又輪到曾蔭培，佢老哥於9.11已經年屆五十七，接班人亦已欽定係李明逵，但係老董又唔知係咪等緊北京查完「快勞」之後，硃砂御批，於是又再退而不決，即退休後再留任三個月，直至十二月十一日再算。
穩定壓倒一切，做一哥，分分鐘要執行戒嚴令，同解放軍司令合作，當然要小心挑選，至於老董就冇法，佢連諗吓買棵葱都要深思熟慮，你有你心急，佢一於三寸金蓮，摸頭摸髻，警隊係男子漢，點受得婆婆媽媽，一於自動波，開始為一哥籌備歡送會。
（圖）過咗五十七歲嘅一哥已經攞埋金紫荊星章，但想返屋企湊孫至少重要等多兩個月。
傳真︰2623-9278
電郵︰