許志安昨日與譚詠麟及黃日華等組成紅星隊作賽，為已故澎馬流浪隊隊員張耀麟遺屬籌款，結果擔任前鋒的安仔表現令人失望，多次帶波都扭不過對方的球員，在場的一班阿伯球迷見狀以粗口問候，安仔得悉後說：「我踢得叻就去英國踢啦，叫佢哋落嚟踢啦。」
一班明星足球隊藝人昨日到旺角大球場參加為已故澎馬流浪隊員張耀麟遺屬籌款的慈善賽，他們組成雅柏紅星隊與足總邀請隊作賽，由譚詠麟任隊長，隊員有范志毅、許志安、洪天明、吳家樂、黃日華、謝天華及羅家英等。
擔任副領隊的劉德華出席完默哀儀式後便匆匆離開，結果紅星隊分別由洪天明及吳家樂射入兩球及一球，最終以三比四落敗。
賽事共分為三段，擔任前鋒的許志安，昨日踢得十分生疏，他在賽事的第二段落場，踢了二十多分鐘，其間曾多次帶波欲過敵隊球員不果而反遭搶去皮球，坐在觀眾席的一班阿伯球迷看得緊張，每見安仔失波都贈予他一句粗口：「X！」幸而在足球場上投入踢波的安仔並未聽到。
事後安仔說：「我冇乜氣，幾個月冇踢呀，我覺得自己表現中規中矩。」得悉被阿伯以粗口問候，安仔沒好氣的說：「我吓吓扭得過就唔使唱歌啦，我去踢利物浦同皇家馬德里，碧咸射罰球都跣腳啦，我唱歌走音就話冇法啫，踢波叻我就去英國踢啦。」有指阿伯要求比較高，安仔說：「叫佢落嚟踢啦。」對於鄭秀文在中環拍戲被外籍男子騷擾，安仔表示不回應。
而隊長譚詠麟昨日亦相當搏命，三段比賽均落場，可謂由頭帶到尾，即使在中場休息，不久後又落場，連坐在休息席上的隊員見阿倫又走出去也說：「阿倫你啱啱返入嚟咋喎。」只見阿倫到第三段時已沒有氣，不過他仍堅持不換人，而羅家英則只在第一段比賽落場踢過波。
採訪：汪正文
攝影：陳偉權
