歐洲國家盃外圍賽十個小組賽事終於塵埃落定，而前晚連場大戰，比較令人意外係部份強隊或者已出線球隊，仍然搏老命贏波狂數對手，真係玩死下盤客！
好似法國、荷蘭、意大利等，對手可謂「魚腩」貨色，「梳打埠」好似唔想輸蝕畀馬會咁，照樣為佢哋開出亞洲盤，結果讓到兩、三球！我求大俠睇番個賠率走勢，呢個讓球位由開售到結盤之間，上落幅度唔大，證明都唔係咁多人有信心捧呢啲強隊上盤喎！
點知幾支強隊最後齊齊大勝對手，大旺上盤。反而二、三線球隊嘅比賽，就旺開下盤，呢個情況唔知又有幾多人估到呢？
講開歐洲國家盃外圍賽，我求大俠高興幾支強隊最後順利出線之餘，亦戥一啲最後關頭功敗垂成嘅球隊唔抵。好似波蘭及比利時咁，贏波都要出局，尤其係波蘭，因為拉脫維亞作客爆冷贏瑞典，而冇咗個次名出線席位。照計瑞典主場，實力又高過拉脫維亞，咁都輸得？
土耳其對英格蘭呢場大戰，我求大俠雖然只係睇電視直播，但都發現到保安情況做得唔錯，起碼場邊觀眾席唔見有球迷起哄搞事，亦唔見有土耳其球迷向英格蘭球員掟嘢。令我諗起西甲聯嘅比賽，成日見有球迷掟嘢入場，好心向土耳其方面嘅保安工作學習吓啦！
范志毅噚日就認真積極，喺張耀麟紀念賽頭場，先為雅柏娛樂紅星隊打咗五十分鐘，之後又為澎馬流浪邀請隊打咗二十五分鐘。踢完頭場，重拎住捐款箱到觀眾席搵人募捐，遇到fans簽名合照亦來者不拒，又大讚流浪隊友有活力有朝氣，初來甫到就咁識做，果然係老江湖。
呢排啲球員唔知點解咁「激情」，繼雲尼斯達羅早前不滿被換離場，而喺場邊掟嘢發洩之後，前晚輪到意大利嘅韋利發癲，同樣不滿被換離場而喺場邊掟水樽。我求大俠覺得球員有鬥心係好事，不過當時意大利都贏緊阿塞拜疆二比○，韋利唔使咁認真嘅，畀啲機會隊友都好吖！