靚仔紅星個人風流係人都知㗎啦，而佢位藝人女友一樣緋聞唔少，好多人都奇怪佢兩個咁樣各有各玩，重可以行埋咁多年。我馮仁昭聽講，原本靚仔紅星之前都諗住飛咗藝人女友，如果唔係有啲意外發生咗，佢照計唔會心軟留低。不過靚仔紅星雖然多情，但佢對女友其實唔差，有次佢因為俾狗仔隊影到同其他女人去蒲，知道女友好唔高興，即刻走去珠寶店買咗塊二百萬嘅翡翠送畀女友。
藝人女友收到呢份大禮，當然開心到死，同靚仔紅星又乜事都冇啦！藝人女友其實都係一個大花筒，一個月最少使靚仔紅星幾十萬，不過以靚仔紅星嘅收入，當然冇乜大問題，藝人女友真係要保佑靚仔紅星唔好飛佢，如果唔係就少咗一部人肉提款機啦！
蕭正楠噚日喺商台舉行佢新碟發布會，邀請咗過百名fans出席，因為蕭正楠咁啱出智慧齒關係，搞到個樣好殘，重擔心唔知點唱現場，不過最終佢都頂硬上。而噚日重專登請咗鄧建明做嘉賓，重話遲啲會請鄧建明食魚翅報答佢㖭，問佢點解咁大口氣用魚翅漱口，佢笑話因為牙痛食唔到蟹啫！係嘅！畀啲彈牙嘅魚翅彈吓就乜都唔痛啦！
Beyond前晚喺大馬嘅演唱會，氣氛好好，臨尾啲觀眾全部企起身高叫安歌三分鐘，場面都幾感人。Beyond三子之後出席慶功宴，葉世榮向在場傳媒講嘢嗰陣，個咪突然出現問題，黃家強就搶咪話係因為家駒有嘢想講，即刻就緩和咗尷尬嘅場面，估唔到平日好似木木獨獨嘅家強，都有啲幽默感喎。
應采兒早前為《新婚通信》雜誌拍攝封面，佢接受訪問時就話：「做我嘅情人，最重要係可以逗我開心，亦要比我聰明，最好係冇乜脾氣，能夠忍讓我。」佢重話：「以前我嚮往一個浪漫熱鬧嘅婚禮，但𠵱家只希望可以去到一個冇人認識嘅地方，同情人喺島上舉行簡單而隆重嘅婚禮。」估唔到應采兒啲婚禮願望都好似一般女仔咁，好平凡㗎咋！
陳敏芝、洪天明同吳家樂噚日出席DTC「祝動鑽飾」展覽，陳敏芝佩戴私伙鑽石耳環到場，佢話：「好有價值，係媽咪喺我十歲時送畀我，以前男朋友亦試過喺情人節送咗隻近一卡嘅鑽石戒指畀我，都好難忘！」另外，天明對於早前報道話佢避仇人古仔，天明就話：「活動前一日我已經通知大會要早走，我根本唔知古仔有份做節目同幾時出場。」
人氣組合Shine噚日喺旺角搞咗個簽名會，講開佢哋新出嘅DVD，有新曲同舊歌嘅MV，又南好慨歎咁同記者講：「睇番啲片，發覺自己個樣同以前好唔同，老餅咗好多。」天佑即刻好緊張咁問又南覺唔覺得佢老咗，重話：「我反而覺得好得意，自己好低能，成日避鏡頭。」其實又南同天佑都係得廿零歲，使乜咁快認老呀﹗
好耐冇露面嘅李樂詩噚日喺尖沙嘴出席寧波巿旅遊局搞嘅宣傳活動，佢話自己早排去咗加拿大兩、三個月進修音樂，順便探吓屋企人，重拾校園嘅生活，覺得好開心。佢亦話睇吓有冇機會可以出番唱片，其實李樂詩唱功真係唔錯，算得上係實力派，加上呢排興鹹魚翻生，佢都有機會！
