呢邊廂嘅本田，正計劃響11月陸續推出Facelifted新版Stream同Stepwgn嘅時候，想唔到剛於9月德國法蘭克福車展上，首次披露咗歐洲Facelifted新版嘅豐田Picnic，此刻間本地代理竟事先張揚，透過媒介向香港車迷宣布，快將在港推售全新Facelifted版Picnic呢！
講番部Picnic七人家庭MPV，今年在港銷量可謂大豐收，單睇9月份，一個月內便售出120部，總計今年頭九個月，單係香港便賣出646部車，比較起一眾同級對手，都可算係大比數拋離，從中亦可曉得呢類中型MPV，仍不乏車迷追捧呢！至於嚟緊部Picnic新版有甚麼大改動，據亞Mark所知，主要集中響外形，要較現有型號來得更見動感；除換上一對更大型頭燈、全新鬼面罩連氣霸外，車身兩邊裙腳更突出，還有車身白底方向指揮燈同尾燈新組合㖭！講到車廂，除有半皮半桃木軚環外，就連中控台亦有追加新設備，若以貨論價，睇嚟今勻一眾同級對手真係有難喇！