講咗兩日香港因為出生率下降，學生人數不足，所以學校鬥搶學生。以教育體制嚟講，大學研究院（graduateschool）位於最上游，幼稚園位於最下游，學校一級一級咁向上輸送學生，英文有個名詞feederschool，就係呢個意思，譬如英皇書院位於港大附近，傳統上，英皇、聖保羅，就係香港大學嘅feederschool，好多年前嘅金文泰、巴富街、真光就係中大嘅feederschool，𠵱家當然情況不同，大學中學配對都冇晒偏好咯，總之睇成績做人。
《亞洲華爾街日報》（十月十日）搞咗一個調查，搵出美國大學之中，邊啲係向最著名、最巴閉嘅專業研究院（如哈佛醫學院、耶魯法學院、華頓MBA）輸送最多學生嘅大學。換言之，邊啲大學最多畢業生進入專業研究院，就係最佳feederschool。計算方法係：進入十五間巴閉專業學院嘅學生數目，除以當年畢業生數目，得出一個feederscore，以此分數排名。十五間專業學院都係美國最有名嘅，包括醫科：哈佛、耶魯、約翰霍布金斯、哥倫比亞、加州大學三藩市；法律：哈佛、耶魯、密芝根、芝加哥、哥倫比亞；MBA：芝加哥、達茅夫、哈佛、MIT、華頓。讀完呢十五間專業學院，乃係前途之保證，好難入㗎。咁樣，最佳feederschool係邊幾間呢？前幾名都係，哈佛、耶魯、普林斯頓、史丹福，完全冇驚喜，但係一啲著名博雅書院（liberalartscollege）一啲都唔輸蝕，前二十五名之中，就佔了八間，其中包括賓架C千金。