恒指已上升到12000水平，中期浪頂隨時出現。
大市幾時到頂，大家都係靠估，同圖表派嘅朋友傾過，佢哋嘅睇法重係好樂觀，話恒指在12000水平整固一段短時間後（或者兩三日），有力向12600進發，然後才會出現一次幅度較大的中期調整。大市升得愈高，日後調整幅度亦會較大。調整完成後，大市會開展新上升浪，向13500至14000的高位推進。
由於熱錢不斷流入，預計在未來的6至12個月內，亞洲股市會繼續受惠，特別係人民幣有升值的憧憬，主要資產在內地的中資股，將會成為追捧的對象。中資股的升勢參差，部份雖已在中途，但唔少仍在起步階段，日後重會有排升，升得多就回，回完又升過。
今次升市，起完藍籌，輪到國企同紅籌，上周五見二三線股開始接力，特別係科技同工業股個勢明顯轉強，今個禮拜，要留意呢瓣。
華潤勵致（1193）呢輪冇點郁過，落後大市，不過佢就有晒呢輪熱炒嘅概念，既係中資股，亦係科技股，主要發展的半導體業務，行業前景看好，德意志銀行上周五就調高英特爾同德州儀器的投資評級，兩股都上升2%；另外，費城半導體指數亦上升1.17%。勵致生產的晶圓，以中國為主要市場，前景更為樂觀。
隨着家電、影音產品、通訊設備及電腦的銷售不斷上升，中國作為世界工廠，對半導體的需求愈來愈大，去年銷售總額為1560億元，估計今年會上升到2000億元，到2010年可增至4800億元。目前全國的生產量只能滿足需求的15%，85%仍須倚賴入口，勵致今年的半導體銷售額逾10億元，仍只係佔消費類半導體市場的10%，發展空間極大。
01年6月及02年5月，勵致股價曾見1.07元及1.02元，03年半導體業務發展成熟兼且起飛，股價勢可創出新高。睇周線圖，上周高收0.82元，已突破上升三角形降軌，另一阻力係9月初高位0.84元，若破位而上，且有大成交支持，升浪即可確認，短期上升目標指向1.05元。
郭兆誠