數碼影音：銀座實地測試<br>QUALIA二萬七蚊貴過金

數碼影音：銀座實地測試
QUALIA二萬七蚊貴過金

SONY早喺六月公布嘅QUALIA016數碼相機可謂「一鳴驚人」，事關CCD只得二百萬像素，叫價卻去到38萬日圓！計起要成$27,000港幣，足夠買八両金有餘，重要係日本限量訂製，而可見嘅將來亦唔會有行貨，港人自然難以一試其魅力。幸好小記有機會到SONY銀座大本營，為大家作一實地測試。

記者、攝影：許福合

■38萬日圓（約港幣$27,000）全機只得快門掣

■喺Showroom可以見到極珍貴嘅Prototype（原型機）。

從外形到種類，SONY嘅電子產品都主要是針對大眾玩家為主，而原來喺呢個層次之上還有一個QUALIA系列，推出超高檔嘅產品，質素同定價都比同類產品高幾倍。QUALIA產品後面會有三位數字跟尾，如今日介紹嘅016，另外還有十幾萬港幣嘅投影機、音響同電視等產品，擺明打富豪用家。
超袖珍一隻手包得晒
一拎呢部016上手，就覺得唔係咁實在，機身細到可以手掌包住，而且重量更只有50g，若果唔係用咗金屬機身，就好似個鎖匙扣咁的骰，可謂CyberShotU嘅縮水版，夠晒迷你。016喺拍攝時，更可見到其設計細微之處，雖然因為機身太細，只可以提供4倍數碼變焦功能，不過由開關到按快門，都只須輕輕一按就有反應，而其他播放同數碼變焦等操作就透過快門旁嘅TouchScreen來完成，實質只得一個按掣，操作夠晒獨特，不過要花啲時間去熟習。

■只係比擦膠略大。

■機頂快門掣一按即有反應，靈敏度高。

■為遷就迷你機身，只好使用專用鋰電池。

仿占士邦百寶喼
雖然QUALIA講明要求高質素，不過016喺解像度方面只得200萬像素，跟市面DC有段距離。最值錢嘅，反而係相片質素同豐富配件有關。由於記憶體使用更慳位嘅MSDuo，要睇番張相靚唔靚，喺機背都設有LCD，可惜就同機身一樣咁迷你，只有0.55吋，要睇清楚啲可以加裝附有嘅LCD放大器。除此之外，016還配備有大量配件，最常用嘅有閃燈、Tele同Wide鏡及遙控器等，機身上已經預留位置去套上配件，玩落就好似自己變咗007一樣周身法寶。

■一套016配備大量配件，要用個皮箱先裝得晒。

間碟配件大晒冷

■LCD只有0.55吋，僅僅可以睇到影緊乜嘢。

■加上呢個LCD放大器，畫面就清楚得多。



抵讚：超級迷你機身，配上大量配件，可按需要提升功能。
要彈：售價約為$27,000，買部六百萬像素DSLR加埋配件都唔使咁多錢。

■配備中還備Tele同Wide嘅專用鏡頭，可補016變焦能力不足。

■使用外置閃燈，有需要時先套上使用。

實地試影：
與SONY其他相機一樣，顏色表現較豐富，圖像邊緣亦較銳利，光、暗位效果唔錯。可惜係未有機會慢慢試齊「占士邦喼」每個配件。