上個禮拜李維榕請食飯，幾乎全港嘅才子都去捧場，八方叨陪末座去學吓嘢，覺得時間過得好快。大約十年前，李維榕喺周刊以「家庭舞蹈」介紹心理學一鳴驚人，當時就係八方處理佢嘅稿，之後佢幫過《蘋果》寫專欄，八方又入咗《蘋果》。
言歸正傳，李維榕呢位萬紐秦（Minuchin）入室弟子，一直喺港大教書，港大最近成立個新嘅家庭研究院；佢做總監。飯局中八方旁邊坐咗位社署前高官，佢話以往社署有啲棘手個案搞唔掂，就會轉介畀李維榕，所以個新研究院成立，佢哋義不容辭幫手，有錢出錢有力出力。
研究院正式開幕禮，請咗楊永強局長去剪綵，到時少爺強是否仍在位冇人知。
大家參觀完研究所之後，都認為香港極之需要呢類中心，因為連董班子呢個煮飯仔嘅嬉戲家庭，一家大細都貌合神離，何況平民、負資產、失業、減薪，點會冇家庭糾紛？有專家幫一幫，好多悲劇都會減少。
不過，政府有錢請滾石樂隊重食埋檸檬，解決家庭糾紛就冇乜預經費，希望啲基金幫吓手，資助多啲。
（圖）由李維榕做總監嘅港大家庭研究院請咗楊永強（圖）去剪綵。
傳真︰2623-9278
電郵︰